الكمبيوتر للمبتدأين( من مذاكرات عالمة كمبيوتر)

ايوة هو درس تعليمي..هات بقى ورقة وقلم ومراية
يوم الأربع ، كنت عايزة أطبع قصة بتاعتي علشان اقراها في لقاء الأدباء في الساقية.لكن الطابعة المصونة مرضيتش تطبع .
قلنا مش مشكلة ، ناخدها على ديسك ونطبعها برة الفلوبي ما اشتغلش.
قلنا –كلاكيت تاني مرة – مش مشكلة أهي مي صحبتي اون لاين من سايبر أبعتهالها تطبعهالي وتجيبهالي على هناك، لسا بقولها انت في البيت ولا في سايبر لقيت الكمبيوتر هنج خالص.
قلنا – لتالت مرة – مش مشكلة ، نعمل ريستارت للكمبيوتر، وعملنا الريستارت وكان اللي كان.الويندوز وقع.
بس القصة – المنحوسة بقى- كنت بعتها لمحمود عزت اخد رأيه فيها فاتصلت بيه على التليفون علشان يبعتهالي على الميل وانا رحت سايبر فتحت الميل ونزلتها وطبعتها..حد فاهم حاجة
كل ده علشان أطبع قصة.
بس المهم انه كان يوم لذيذ، بعد لقاء الادباء حضرت حفلة اسكندريللا اللي كانت جميلة جدا.
تاني يوم بقى قلنا ننزل ويندوس جديد علشان نعرف ندخل على الشبكة المصونة.اتصلت بمي صاحبتي علشان تيجي تنزلي ويندوز( عارفة ان العجل في بطن امه بيعرف ينزله لكن أنا مش العجل في بطن امه..واضح يعني)
نزلت المأسوف على شبابها مي مين بيتها ، ولعنة الكمبيوتر ماشية وراها ، قوم ايه ، تيجي تعدي الشارع عربية واحد – ربنا لا يكسبه – خبطتها ورمتها على الطريق وأغم عليها لدرجة ان كانت هتدوسها عربية تانية لولا راجل فرمل في الوقت الصح.
بس الحمدلله مي حية ترزق ومفيش كسور كمان ، كلها كدمات.وأحسن حاجة بقى انها بعد ما اترميت في الشارع ده كله الخمستاشر قرش اللي في جيب البالطو بتاعها موقعوش.
وعلشان هي فتاة المهام الصعبة ، صممت رغم المتاعب الجسدية والنفسية والمهلبية انها تكمل المسيرة لبيتي وتيجي علشان تنزل الويندوز.
لكن الويندوز العميل أبى أن ينزل كاملا.. نزل من غير ألوان ومش معرب(مع ان نفس النسخة دي منزلين منها قبل كده وكانت شغالة)
تاني يوم بقى عبدالله أخويا جاب صاحبه وغيروا النسخة واشتغل الحمدلله.
بس من غير صوت..الريال بلاير والويندوس ميديا بلاير شغلتهم ميت مرة والأغاني مش بتشتغل.الأفلام بقى لقيتها موجودة صورة بس ويقولي مش عارفة عندك ايه في ال audio.هنتعلم بقى نعد على الكمبيوتر من غير أغاني.

اسكندريللا اليوم في ابساقية

مرحتلهمش ولا حفلة قبل كده، بس شكلهم جامدين والله..ناس كتيربتقول كده
لما أرجع ان شاء الله هبقى اكتب عنهم
المهم أي حد بيحب الشيخ امام وسيد درويش يتفضل ييجي ويجيب تذكرته في ايده

( الصورة ملطوشة من مدونة كما أرى)

أيها المدون القاطن في الشبكة العكبوتية..لا تقرب بيتا الذي أحضرته لك حوجل.. بيتا فيه سم قاتل

قعدوا يقولوللنا حولوا بيتا حولوا بيتا..والناس البدائيين زي حالتي قعدوا يغروهم ان بيتا استعمالها سهل ومن غير html
ولا أي حاجة من الحاجات السوبر اللي مبفهماهاش دي
وحولنا لبيتا وكان اللي كان..
وكان أول لقاء لينا مع أنكل بيتا في تلك المونة الجديدة..
وأحكم أنكل بيتا الخدعة..أول بوستين نزلوا بسلاسة تامة، لغاية ما الواحد استقر هنا ورستق حاله ، وبدأت الحرب.
اجي أرد فيمدونات أي حد ، أو حتى أرد على الناس في مدونتي ميرضاش يعمل ساين ان
علشان أنزل بوست جديد أقعد كام يوم على ما تفتح معايا ..وأكون نسيت كنت عايزة أكتب ايه أو الموضوع اللي عايزة اكتب عنه انتهى..
وكله كوم والصور كوم..
يفضل يقولي
Your image is being uploaded
لكن هيهات..لا بتأبلود ولا حاجة..
ولأني متفائلة ومبتعلمش من أخطائي ، قال ايه قمت أعمل بلوج جديد لحوارات الأدب والفن وكده.. علشان جو المدونة دي مش ماشي مع الادب خالص..المهم عملتها اخيرا امبارح بس بعد قرف..اسبوعين بحاول فيها..
لو حد ليه في الحوارات دي يبقى يزورني هناك
حورس
بس الحمدلله...لازلنا شعب بيتاوي ..
ونشكر أنكل بيتا على تعاونه معنا.
*************
تحديث:
جاية انشر الموضوع ده، تقريبا بيتا عرفت اني بشتم فيهم..راح الموضوع اتنشر في اللامعقوليزم لوحدها..ربنا يستر علينا من غضب البيتا

مش فايقة

"أنا لسا صاحية من النوم ومش فايقة"
لو انت حد يعرفني هتبقى الكلمة دي تقريبا أول كلمة ببدأ بيها حديثي معاك، سواء الحديث ده على التليفون أو على الماسنجر أو حتى وجها لوجه.
المشكلة ان حياتي الأساسة بقضيها وانا نايمة..أما النشاطات الأخرى في الحياة فدي بتكون في اوقات الفراغ.
لما بقعد مع أصحابي ، ويفضلوا يحكوا عن حاجات حصلت أيام 3 ثانوي- يعني من 3 سنين بس- غالبا ممبقاش فاكراها. لكن هما بيقولولي " انت كنت نايمة ساعتها " أو " كنتي لسا صاحية من النوم ومش فايقة"
لما دخلت الجامعة ، وأنا في سنة أولى كانت في بنت كل ما تشوفني تبتسم كاننا نعرف بعض..هو بصراحة انا كنت بحس ان شكلها مألوف ، بس قلت يمكن قابلتها في امتحان القبول بتاع الكلية ولا حاجة، لغاية مرة كانت قاعدة جنبي في محاضرة، فقلت أتشجع وأسألها احنا نعرف بعض منين..طلعت انها كانت معايا في الفصل في ثانوي، ولما سألتها أمال أنا معرفهاش ليه قالتلي:"أصلك كنتي نايمة طول السنة"
طبعا عادة النوم لسا ملازماني في الكلية ، في محاضرات بدخلها مخصوص على أساس اني انام فيها ، لأن بعض الدكاترة بيساعدوا على النوم جدا..زي دكتورة ماري تيريز اللي بوصفها بشدة لمرضى الأرق.
كل يوم في الكلية مبعرفش أكمل اليوم من غير ما انام محاضرة واحدة على الأقل.ده غير طبعا ان الطريق رايح جاي ببقى نايماه في المترو.
وفي المترو ، كتير بتضيع المحطة اللي نازلة فيها لأني نايمة.في ال CTA
مرة سألت السواق اذا كان بيعدي على الحتة الفلانية، والحمدلله اني سألته لأن لولا كده كان مممكن ألف معاه طول الليل وانا نايمة..لأنه لما جت الحتة اللي انا عايزة أنزل فيها ندهلي ..وانا طبعا كنت مستغرقة في النوم ومحستش لغاية ما الركاب قاموا من مكانهم وتعاونوا انهم يصحوني...وطبعا المكان اللي كنت عايزة انزل فيه كان عدى بقاله عشر دقايق..عقبال ما فقت بقى.
زمان قريت في بريد الجمعة رسالة لواحد بيشتكي من مراته انها رغم انها ست كويسة جدا الا انها نايمة طول الوقت..حتى الطبيخ بتطبخ وهي نايمة، يعني تقوم تحط التسبيكة على النار وتنام شوية ، وتصحى بعد شوية تقلبها وتنام تاني وهكذا.
دلوقتي طول الوقت حاسة ان الست دي هي مستقبلي.
بس رغم كده مش بتضايق.. ولسا بحب أنام.

بتعرف تاكل في نفسك

كنت عيانة
لأ مش حاجة جامدة، دي مجرد أنفلونزا.. بس شديدة حبتين.
لما بقى تعد في البيت 4 ايام ورا بعض من غير ما تشوف شكل الشارع فده الجحيم .خصوصا لو انت بتحب تخرج طول الوقت وبتكره قعدة البيت زيي.
ولأني مكنتش عارفة أركز في قراية أي حاجة و الكمبيوتر كمان كان بايظ فمكنش قدامي غير قعدة التليفزيون طول الوقت أو النوم أو الخناق مع اخواتي ،ولما أزهق من التلت حاجات دي بقوم بهوايتي المفضلة اكل في نفسي
وللي بميمارسوش تلك الهواية أحب أقولهم انها هواية ممتعة جدا ، ومبتطلبش مصاريف أو اي أدوات .. المهم يكون عندك عزيمة وهمة للتدريب.
علشان تقوم بتلك الهواية كل اللي عليك انك تفتكر كل المواقف اللي مريت بيها في الفترة الأخيرة.. كل حرف وكل حركة..افتكر كويس قوي.
بعدين اتبع استراتيجية look beyond
وهي استراتيجية رائعة في اللعب ، وطبعا من اختراعي.
الاستراتيجية دي بتتركز في انك تحلل تصرفات كل الناس في كل المواقف اللي انت افتكرتها دي ، وتبدأ تنسى الظاهر وتدخل للباطن ..مش فاهم طبعا؟
ابسطهالك
يعني تحاول تعرف دوافع الناس الخفية لكل تصرف تصرفوه معاك.. وتحلل الموقف حسب مزاجك بقى..مش قلنا هتاكل في نفسك.
ابسطهالك؟
هاديك مثال:
يعني لو انت مدي صاحبك معاد علشان تنزلوا تشتروا هدوم مع بعض، بعد كده هو كلمك وقالك انه ابوه مرضيش يديله فلوس ومش هيشتري هدوم مع بعض .
في العادي بقى كان ممكن تقول يا عيني ، الولد مخدش فلوس ومش هيشتري حاجة.
لكن لو اتبعت نظرية look beyond هتعرف ان أكيد صاحبك مرضيش ينزل يشتري لبس معاك علشان حاجة من اتنين: يا اما مبيعجبهوش ذوقك ، يا اما كل ما بتنزلوا مع بعض بتكوش انت على الحاجات اللي بيختارها لنفسه.
عرفت بقى انت كنت أهبل ازاي لما صدقته؟
لو انت بقى لسا جديد على ( أكل نفسك ) هتكتفي بهذه المرحلة .
لو انت راجل قديم وخبرة ، هتعد تفكر في المواقف اللي تدعم نظريتك ، لو شاطر بقى هتتصل بصاحبك وتتخانق معاه.
ولو عايز تتأكد ممكن تروح تطب عليه في البيت وتشوف الهدوم الجديد اللي اشتراها... متصدقهوش لما يقولكان عمه اللي في الامارات هو اللي جابهاله..انت بيخيل عليك برضه الكلام ده.

هواية رائعة مش كده؟
مسلية جدا، لأ ومفيدة طبعا.
.......
معلش أنا دماغي مصدعة من الأنفلونزا ومهيسة على الاخر.

عن الموت .. والندم

موت حد قريب منك بيوجع جدا..
لكن موت حد تعرفه ومش قريب يمكن يوجع أكتر..
الندم ان كان قدامك فرصة انك تعرفه أكتر لكن محصلش..يمكن علشان كسلت، يمكن مكنتش شجاع بالقدر الكافي ، يمكن حسيت انك مش محتاج انك تعرفه.
لكن لما يموت بتعرف ان ده كان غلط ..كان لازم تكون أشجع ، كان لازم تنتهز الكذا فرصة اللي كانوا قدامك وضيعتهم بلا مبالاة غريبة قوي.
انت لسا ندمان ..رغم كده، لسا معرفتش كل اللي انت عايز تعرفهم، لسا بتضيع كل الفرص اللي قدامك
ولسا هتندم..هتندم كتير

يا المنديل بكرامتك..يالبلع ..يا أما انت اللي جنيت على نفسك

هو كل الشعب عنده بلغم؟
كل يوم وأنا طالعة أو نازلة من سلم المترو لازم أكون محاطة بالناس اللي بتف، كأن الشعب المصري كله عنده بلغم.
وحتى لو كلهم عندهم بلغم، ايه اللي هيضرهم لو اشتروا علبة مناديل ( من ام ربع جنيه مش الكبيرة) علشان يتفوا براحتهم؟
على فكرة منديل واحد ممكن يتفوا فيه خمس مرات ، قول هما بيتفوا عشر مرات في اليوم يعني منديلين في اليوم.يبقى علبة المناديل هتكفيهم 10 ايام.يعني كأنهم صرفوا شلن بس في اليوم علشان يرحوني من تفافتهم.

في حل تاني بقى أرخص وأنضف .. يتفضوا سيادتهم يبلعوا البلغم، ده حتى فيه فيتامينات وبروتينات ( بدال الفاكهة واللحمة) وأهو يتغذوا بالمرة.

الحل بقى اللي مش هيبطل يتف انه يتعاقب بلحس تفافته من على الرصيف.

يا مظاهرة ما تمت.. خدها الأمن وطار

النهاردة كان مفروض في مظاهرة أمام سينما مترو للاحتجاج على أحداث التحرش بوسط البلد . وسينما مترو بالذات بوصفها كانت مسرح الأحداث.
المهم ، أنا أصلا مكنتش ناوية أروح علشان عندي محاضرات ..وكمان علشان الوقفة بتاعة يوم الخميس اللي فات ( اللي أنا جيت على اخر 10 دقايق فيها) كانت كفاية الى حد ما.
لكن قعدة الكلية – بعيد عنكم – تسد النفس..ولأن عندي مرارة واحدة وعايزة أحافظ عليها قررت اني امشي ، فكلمت مي صحبتي وقلتلها انا رايحة المظاهرة معاكي.اتقابلنا في المترو ورحنا.
وصلنا قدام سينما مترو الساعة 3 بالظبط. كان المشهد أكثر من رائع ، تخيل معايا بقى :
حوالي 50 فرد أمن رتب مختلفة باللبس الميري اضافة الى المئات ( وأنا مش ببالغ خالص ) من اللي لابسي مدني ، وطبعا شكلهم بيبقى باين خالص ( حد موزع عليهم طقم نظارات شمس)
المظاهرة بقى مكنش فيها ولا نفر.
وده ان دل على شيء فهو يدل على ان الأمن المصري ( ربنا يخليهولنا) منضبط تماما في مواعيده، أما المتظاهرين بقى هما اللي بيتلكعوا.
هو يمكن يكون في ناس جت ، بس فرادى فالأمن مشاهم زي ما عمل معايا أنا ومي.
ان كان بقى في حاجة كويسة حصلت النهاردة فهي اني روحت بدري ولحقت فريندز..اه وكمان شفت مستر سيد ( هبقى أحكي عليه بعدين).

اغتراب الكورة

يمكن هي حاجة بسيطة وهايفة لكن هي فعلا اللي بتحسسني بالاغتراب.. الكورة
يعني أنا عايشة مع أربع أفراد في البيت ده
ماما وبابا واخواتي الأتنين
الأربعة بيعشقوا الكورة بطريقة غير طبيعية، يعني من واحنا صغيرين كان الأهلي يكسب نعرف انه هيبقى يوم سعيد علينا ، بابا يخرجنا يعشينا برة أويفسحنا في أي حته ..اهو شيء من هذا القبيل.
ولما الأهلي يخسر كنا نستخبى في اوضنا علشان غالبا بابا هيزعق على أي حاجة ( بنظام التلاكيك)
لما بابا وماما يبقوا قاعدين لوحدهم وبيتكلموا كنت دايما ببقى عارفة ان الاحاديث اللي بيقولوها دي تتعلق بالكورة ، واللي عمله مرتضى منصور ( الزملكاوي الوحش) أو عدلي القيعي عرف يضحك على الزمالك ويشتري مين.
أخواتي كمان كانوا بيحبوا الكورة من صغرهم، ولما كبروا حبوها زيادة. يعني أخويا بتاع الثانوية العامة بيخرج مع الرابطة طول الوقت.. ولا كأنه فاضي
أقربها امبارح الفجر لماراح يستقبل الاهلي في المطار..

ده كله مش موضوعي ، الموضوع بقى اني بحس ان انا الغريبة في البيت ده، يعني تلات اربع أحاديثهم مش بفهم منها حاجة..
الى جانب اني ملقبة - الى جانب القابي الكتيرة- بالزملكاوية الدسيسة ، ده على الرغم اني لا بحب الأهلي ولا الزمالك.. الموضوع عندي سيان.

هو أنا معنديش حل للموضوع ده غيرانهم يلغوا الدوري ونستريح بقى من الهم ده

يا هلا بيا

مش أول بلوج ليا..
لكن رغبة ساحقة ماحقة في التغيير
ولأني متغيرة دايما فأنا بغير دايما..

ودمتم