Monday, November 13, 2006
اغتراب الكورة
يمكن هي حاجة بسيطة وهايفة لكن هي فعلا اللي بتحسسني بالاغتراب.. الكورة
يعني أنا عايشة مع أربع أفراد في البيت ده
ماما وبابا واخواتي الأتنين
الأربعة بيعشقوا الكورة بطريقة غير طبيعية، يعني من واحنا صغيرين كان الأهلي يكسب نعرف انه هيبقى يوم سعيد علينا ، بابا يخرجنا يعشينا برة أويفسحنا في أي حته ..اهو شيء من هذا القبيل.
ولما الأهلي يخسر كنا نستخبى في اوضنا علشان غالبا بابا هيزعق على أي حاجة ( بنظام التلاكيك)
لما بابا وماما يبقوا قاعدين لوحدهم وبيتكلموا كنت دايما ببقى عارفة ان الاحاديث اللي بيقولوها دي تتعلق بالكورة ، واللي عمله مرتضى منصور ( الزملكاوي الوحش) أو عدلي القيعي عرف يضحك على الزمالك ويشتري مين.
أخواتي كمان كانوا بيحبوا الكورة من صغرهم، ولما كبروا حبوها زيادة. يعني أخويا بتاع الثانوية العامة بيخرج مع الرابطة طول الوقت.. ولا كأنه فاضي
أقربها امبارح الفجر لماراح يستقبل الاهلي في المطار..
ده كله مش موضوعي ، الموضوع بقى اني بحس ان انا الغريبة في البيت ده، يعني تلات اربع أحاديثهم مش بفهم منها حاجة..
الى جانب اني ملقبة - الى جانب القابي الكتيرة- بالزملكاوية الدسيسة ، ده على الرغم اني لا بحب الأهلي ولا الزمالك.. الموضوع عندي سيان.
هو أنا معنديش حل للموضوع ده غيرانهم يلغوا الدوري ونستريح بقى من الهم ده
Subscribe to:
Post Comments (Atom)
8 comments:
هاتلغى الدورى عشان مالكيش فى الكورة !!
هههههههههههههههه
اقولك على حل اسهل يابنتى
عزلى من البيت ده :]
هتلغى الدورى
فى الكاس
و لو لغتيه فى بطولة افرقيا اللى خدوها
و بعدها فى كاس العالم للاندية
كفاية كده
انتى لسه مسيبتيهمش
او تبقى اهلاوية وتشجعى معاهم
و ارسيلك على بلوج بقى
سلام
زعرورة
ألغي الدوي طبعا...هو أنا قليلة
بعدين أنا لو عارفة أعزل من البيت ده كنت عملت كده من زمان..ومش علشان الكورة بس
محمد ياسر
هو الدوري أس المشاكل..يعني هو الي بيأدي لبطولة أفريقيا وكاس العالم للأندية..وبعدين دي خطوة ابتدائية علشان يغوا الكورة خالص.
بالنسبة للبلوج بقى ، فزيادة البلوج بلوجين يا باشا :)
أقولك أنا الحمد لله عندى فى البيت مش كده خالص يعنى آخرهم هنا أخويا و ساعات بابا ... باقى البيت كده زيى يعرف طشاش بيشجع و هو قاعد مكانه علشان كده ساعات أخويا بيطفش و يتفرج على الماتش لو مهم برة البيت ... المشكلة بقى بتكون فى الكلية الولاد طبعا بطبيعتهم بيحبوا الكورة زودى على كدة انى أصحابى البنات كمان مهووسين بالكورة ... فلما يبقى فيه ماتش باعرف انى هاروح الكلية تانى يوم طاقتى كلها تخلص و انا ماو وراياش غير جملة واحدة ( غيروا الموضوع ) ... الحل انك تسيبى أهلك و أنا أسيب أصحابى ... أو اننا نرضى بنصيبنا
هي خطوة أولى يا أيات نسيب أهلنا وصحابنا( تغيير برضه ..بلا هم)
وبعدين نرضى بنصيبنا برضه..ليه لأ
بعدين نقوم بثورة ونلغي القرف ده من البلد أصلا
طب كويس انك واخد الموضوع بروح دعابة..
أنا أصلا لا أعرف لعيبة ولا بشوف مطشات علشان أغيظ حد بيهم للأسف.
احنا كان عندنا موضوع الأهلاوية والزمالكاوية دي في العيلة .. بس تقريبا أغلب الزمالكوية اللي في العيلة انقرضوا أو هاجروا أو زهقوا، فمبقاش في غير الأهلاوية
موضوع الانتماء بقى للفرق ده بيفرسني بجد
يعني ساعة كاس العالم للأندية بتاع السنة اللي فاتت لما الاهلي خد المركز الأخير أخويا كان بيعط بالدموع وفضل يومين مابينمنش( مع انه في العادي نايم طول الوقت)
ولما استغربت ماما قالتلي انت مش شايفة اللعيبة مموتين نفسهم من العياط ازاي؟ قلتلها: يعني دول بيعيطوا علشان ده شغلهم، لو كسبوا هياخدوا ألات - وربما ملاييين- لكن انتم ايه اللي بيدخل جيبكم من الموضوع ده..فردت عليا بحكمة : الانتماء!!!!
موضوع سماجة( كده فعلا أحسن من سماكة) ده بقى بيتناقش قدامي طول الوقت.. بس العيلة رأيها استقر ان ده لاعب قليل الأدب أصلا وميتحقش يلعب في الاهلي..علشان كده الأهلي سمع كلامهم وعرضه للبيع.
بيب بيب أهليييييي! :)
أنا برضه ماليش في الكورة خالص ، ولما بيكون فيه ناس بيتكلموا عنها بأحس أني عايش في كوكب تاني ، بس كده أحسن .. المبالغة في الاهتمام بكرة القدم في رأيي دليل على الفراغ
وعمري ما تابعت ماتش من أوله لآخره .. ولا عندي صبر لكده.
قال كوره قال.. أنا معاكي في إلغاء الدوري ، اعملي انت بس حركة "كفاية كورة" واحنا حاننضم فورا.
Post a Comment