بريء ودمه خفي

امبارح كنت قاعدة على القهوة مع مي وشيماء وسامو و محمد ياسر
فجه ولد من أطفال الشوارع – على رأي تيته سوزان- عنده حوالي 5 أو 6 سنين وكان مصمم يبيع لنا مناديل .
بس واضح ان الولد رغم انه من أولاد الشوارع لكن عنده مبادئ ، راح لسامو علشان يشتري منه فسامو قاله روح لطنط مي هي هتشتري منك ، لكن الولد رفض وأبى وقال بشموخ " لأ ، بنات لأ" وبصلنا بصة وحشة قوي ومشي.
وكل شوية ييجي تاني يضرب سامو ومحمد ويجري ، لكن طبعا زي ما مش بيبيع لبنات هو برضه مش بيضرب بنات.
أنا بقى فسرت كرهه للبنات لسبب من الاتنين:
1- بنت تانية من أطفال الشوارع – على رأي تيتة سوزان برده- كان بيحبها لكن خليت بيه وهربت مع الولد شلاطة الفتوة.
2- البنات بخلا ومش بيرضوا يشتروا منه .

أنا أصلا مكنتش عايزة أتكلم في موضوع أطفال الشوارع ، علشان تيتة سوزان زهقتني منه ، وانتوا عارفين أنا قد إيه بعز تيتة سوزان ومبفوتلهاش جايزة – من اللي بتاخدهم كل يوم – بس قليل لما تقابل ولد من الأطفال دي ويكون لسا محتفظ ببراءته ، لسا بيخليك تضحك على أفعاله العفوية ..
الأطفال دي بتبقى اتعلمت تبقى كبيرة من زمان ، معندهمش أي براءة أو طفولة من اللي بيشوفوه بحياتهم كل يوم .
علشان كده ساعات بيبقى صعب على الناس العادية انها تتعاطف معهم.
والبراءة دي أكتر حاجة بيخسروها من قعدتهم في الشارع ، بيعيشوا حياتهم معجزين.