متغيرة شوية

التفاصيل الطويلة لحلم الليلة

2009-12-01T14:24:00.000-08:00

براد كان واقف هناك بيصور وأنا كنت بتكلم مع واحدة صحبتي عن فيلمه الجديد..

أنا : شفت أول جزئين بس ، بس شكله فيلم حلو.

صحبتي: لأ بس بوخ بعد كده ، ده جاب معاه انجيلينا في الجزء الرابع.

أنا : ليه بس كده ، هو لازم يحشرهالنا معاه وخلاص.. أنا مش بطيقها.

فجأة يظهر براد من ورا صحبتي ويبصلي نظرة عتاب طويلة، والبنت بتمشي علشان تسيبنا لوحدنا..

براد: ليه كده يا سلمى..أنا مش قلتلك نفسي تبقوا صحاب

أنا :معلش يا براد ، انت ملقيتش غير الرخمة دي.، مش قادرة أطيقها.. مش قادرة مش قادرة!

فجأة برضه بتيجي انجلينا وهي مبتسمة ابتسامة طويلة ..(مسمعتنيش وأنا بشتمها)

انجيلينا: ازيك يا سلمى ، هتشوفي الماتش النهاردة؟ أنا لازم أحذرك اني بشجع اسبانيا

وقلعت الجزمة والشراب علشان توريني انها دهنت رجليها بألوان علم اسبانيا

أنا: لأ يا معلمة ، البرتغال هي اللي هتكسب ، ساراماجو بيلعب.

براد: طب ايه رأيكوا تروحوا مع بعض الاستاد علشان أنا هيبقى عندي شغل

وبصلي بصه كلها أمل اني أوافق ..

قلبي وجعني الصراحة ، خصوصا اني لقيت البت انجيلينا مش واخدة خوانة من ناحيتي ، وبعدين براد قالي في لحظة صراحة " يا سلمى انا عايزك انت وهي تتصاحبوا ، ده مهم جدا عندي" وزي ما انتوا عارفين مقدرش اكسف براد

المهم

كنت في المترو رايحة اقابل انجيلينا في محطة السادات ، وعمالة أفكر هعرفها ازاي.. لقيت عيلة للابسة باروكة سودا كاريه ناعمة ، وعليها كاب ، بتنده من بعيد "سلمى .. سلمى"

البت يا ولداه بقت أقصر مني ، وماشية ماسكة فيا كأني امها

بعدين كان فيه مخبز في المحطة بيبيع باتيه وسميط وبرتزل ألماني..قالتلي "مانشتري بقى علشان ناكله في الماتش"،

وأنا محرمتهاش وجبتلها كل اللي نفسها فيه

وبعدين خدتلها تاكسي من المحطة كمان ومرضيتش امرمطها في ميكروباصات الجمعية التعاونية

يبقى وجبت مع انجي ولا لأ؟

*******
اضغط على الصور للتكبير

الصور من تصميم وتنفيذ بوزو

2009-08-24T21:51:00.000-07:00

رمضان السنة دي فيه حاجة حلوة قوي

غير الياميش والمكسرات والفوانيس والزينة والسيت كوم وقناة موجة كوميدي

في حاجة أحلى من الحاجات دي بكتير

السنة دي هي أول سنة من ساعة ما اتولدت محدش يقولي الجملة المشهورة:

"صايمة ولا زي كل سنة"

وده بيدل على ان الشعب المصري اخيرا قدر يدرك ان الدعابة لما بتتقال كذا مرة بتبقى رخمة

شكل القلش هيقل في البلد يا رجالة

والحمدلله

2009-04-27T18:59:00.000-07:00

سلمى وكلب trial version

2009-01-11T04:53:00.000-08:00

لما كتبت امنياتي في السنة الجديدة مرة مع اية ومرة مع ياسر ، مكنتش حتى أجرؤ اني اتمنى ده
أنا معروفة برعبي الفظيع والغير منطقى من الكلاب ، عادي الأطفال كلها بتخاف من الكلاب ، المشكلة اني كل ما بكبر كل ما بخاف منها أكتر.
في كلب معسكر على طول قدام الشغل، اللي أقدم مني بيقولوا ان الكلب ده متربي هنا من ساعة ما كان صغير قوي ، فطبعا كان كل الموظفين بيلاعبوه ويأكلوه وكده ، هو بقى متآلف جدا مع المكان والناس ، الغبي بقى انك لو عديت قدامه لازم يمشي وراك ويروح معاك الحتة اللي عايزها قال يعني بيوصلك ويحميك وكلام فكسان كده. أنا بقى مش عايزة حد يوصلني علشان لما عملها سمعت كولكشن دقات مسمعتهوش قبل كده من قلبي ، وفهمت ازاي فعلا الناس بتموت من سكتة قلبية من الرعب. من ساعتها بقيت بحدد هفطر من أي حتة من المحلات اللي حوالين الشغل بناء على موقع الكلب.
في مليون موقف بقى غير كده ، من الامتحانات اللي ببقى مش عايزة أروحها لما بلاقي كلب في الشارع الى الاوقات اللي ببقى راجعة البيت متأخرة أصلا وأمشي ربع ساعة زيادة علشان اغير طريقي وممرش بكلب.
الحاجة بقى اللي حصلت من غير توقع كده ، اني في يوم ماشية في حالي متأخرة على شغلي 3 ساعات بحالهم ، مرة واحدة لقيت وشي في وش كلب وسادد عليا الشارع كمان ، جيت على اليمين على أساس انه ييجي على الشمال ويعدي ، راح جاي على اليميمن هو كمان، جيت على الشمال راح جاي على الشمال ، اتسمرت مكاني – وده كان من الرعب طبعا- لكن تقريبا هو افتكر اني جامدة وقوية وممكن ءأذيه ولا حاجة ، قوم ايه بصي لي بصة رعب كده وطلع يجري.طبعا بقى مش هوصف السعادة اللي فيا من ساعتها، وحاسة اني انتصرت على فوبيتي وحركات ، بس خايفة بقى الموضوع يرجع تاني ، علشان أنا أصلا مرعوبة دلوقتي وانا بكتب البوست ده.

كلنا ليلى: عن حلم

2008-10-19T08:07:00.000-07:00

أعتقد أن أبسط حقوق ليلى أن يكون لها حلم ، وحرية أن تسعى لتحقيقه.
أن تصادر حلم ليلى ، أن تملي عليها أي الأحلام تجوز لها لهو أقسى أنواع العنف.
المشكلة الكبرى أن ليلى تربى على أن تدفن أي حلم " غير جائز" ، تدفنه بمكان حتى فكرها لا يستطيع الوصول اليه. منذ ولادتها ، تتعلم ليلى درسا أهم من كل شيء ، يدرسون لها طريقها في الحياة الذي لا يجب أن تحيد عنه.
هدفها يجب أن يكون دائما الزواج ..الذي ليس لدي أي شيء ضده بالطبع - المشكلة هو أن يكون هو الدرب الوحيد المتاح.
فاذا تعلمت ، فهو تتعلم لتحصل على زوج أفضل يريد زوجة متعملة.
وهنا يجب ألا تتمادى فتطلب ان تدرس بالخارج مثلا : لأنها لا يمكنها السفر بدون محرم.
اذا عملت ، فهي تعمل حتى تقابل زوجا مناسبا في مكان العمل.
والعمل نقطة شديدة الأهمية: ليلى مقرر لها مسبقا أعمال "تناسبها" ، فهي لا يجب أن" تحلم " حتى مجرد الحلم بشغل الوظائف" الرجالية على حد قولهم.
أصدقاء ليلى – حتى الفتيات منهم- يجب أن يمرون بالعديد من مراحل التصفية من قبل العائلة والزوج.
فهذه ليست مقبولة لأنها غير محجبة.
وتلك لأنها تدخن .
وأخرى لأنها تخرج كثيرا.
*****
هذا العام من كلنا ليلى مخصص للشهادات، ولأني لم أستطع أن أحصل على شهادة مسجلة ل م ، فسأحكي فقط حكايتها ، ليس كما روتها ، بل كما عشتها معها.
م هي انثى شديدة الجمال ، من النوع اللي بياخد عقل الرجالة فميفكروش في اي حاجة تانية ، وهي طفلة مات ابوها وسابها مع أمها واخوات ذكور.
من وهي في اعدادي كان بيجيلها عرسان كتير قوي ، اخواتها سمعوا الحكمة الشعبية اللي بتقول ان اللي بيجيلها عرسان زيادة عن اللزوم بتعنس ، فجوزوها وهي عندها 16 سنة لوحد أكبر منها ب 18 سنة ، يعني سنه أكثر من ضعف سنها.وقتها م كانت في الدبلوم ،لكن أصرت تكمل الدبلوم وهي متجوزة ، ودي بادرة بتعكس شخصية م بعد كده.
أنا مكنتش اعرفها ساعتها لكن باحكي اللي حكيتهولي ، جوزها – وزي منا شفته بعد كده - هو مش النوع المتدين ، لكن عايز يطبق الدين – من وجهة نظره طبعا – على مراته ، خلى مراته تتنقب. منعها من الخروج لأي حتة ولا حتى انها تزور أهلها ، كان بيسافر يشتغل في الخليج وهو متبع دبة النملة اللي بتعملها هنا.
لغاية هنا قصة م عادية أكثر من اللزوم ، في الفات زيها ، وانا متأكدة ان كل حد بيقرا دلوقتي بيفكر في واحدة يعرفها عايشة نفس الحياة.
المختلف ان م ماستسلمتش.لما قابلت م أول مرة كان عندها 22 سنة ، يعني بعد 6 سنين من جوازها ، ورقتها جوزها كان في الخليج كالعادة وهي كانت خلفت طفلين ، م كانت عاملة مشروع مع واحدة جارتها لتربية عيش الغراب وبيعه ، وبتفكر في مشروعين تلاتة وهي قاعدة في بيتها ، برضه علشان جوزها مياخدش خبر.
لازم برضه أقول ان جوز م كان مهندس وبقاله سنين بيشتغل في الخليج ، يعني حالته المادية مش سيئة اطلاقا ، لكن كان مع>ب م في الفلوس ، مش بيديها غير بالقطارة ومش بيجيبلها حاجات كتير هي محتاجاها ، وكل ده مش بخل زي ما هو شايف ان الفلوس دي ممكن تخليها تخرج عن طوعه ، أبسط مثال على كده ان لغاية دلوقتي مش راضي يجيبها غسالة أوتوماتيك ، علشان تفضل تاخد يوم كامل في الغسيل ، يعني ببساطة ، هو عايزها متحصلش على أس رفاهية علشان متبتديش تفكر فتتمرد.
لما م عملت مشروع عيش الغراب ده مع جارتها عملته علشان سببن ، أولا انها بتكره تبقى عايشة فاضية ، ثانيا ، ده كان بيديها فلوس اضافية تجيب بيها حاجات محتاجاها وجوزها مانعها عنها.
بعدها بشهور، م كانت نفسها تدرس دعوة وقران في معهد قران ، الطبيعي ان لو جوزها متدين حقيقي كان هيرحب جدا ، لكن طبعا لأن هو مش عايزها تخرج من البيت – حتى لو كانت خارجة المسجد – فهو رفض تماما. وبرضه م استنت لما سافر شغله وراحت المعهد من وراه.
بالطريقة دي فضلت كل شيء عايزة تعمله هو بيرفضه تماما وهي تستنى لما يسافر وتعمله من وراه.
طبعا الحياة دي مش صحية أبدا في رأي اي حد، وفي رأيها هي كمان. من سنة قررت م انها تواجه. طلبت الطلاق أو ان جوزها يحترم حياتها شوية ، كل اللي طلبته انها تكمل دراستها في الجامعة المفتوحة ، وانه يزود مصروف البيت شوية على قد امكانياته، م كانت معتقدة ان حياتها معاه في الكام سنة دول والطفلين اللي بينهم هيبقوا ليهم أهمية بالنسبة له وانه هيتمسك بيها علشانهم. لكن ده محصلش. جوز م طلقها علشان طلبت أبسط حقوق ليها.
طبعا مش هتكلم بقى عم أهلها اللي مرضيوش يستقبلوها علشان طلبها للطلاق ده ، واضطرت م انها تعيش عن واحدة قريبيتها من بعيد (رغم أنها حاضنة والبيت من حقها أصلا)
المهم بعد حوالي شهر، جوز م جه وتهدلها بكل اللي طلبته بس ترجع ، هي وافقت علشان تمشي الحياة وعلشان الولاد وكل ده ، ورجعت ، لكن جوزها استغل ضعفها قدام ولادها ولحس كل اللي كانوا اتفقوا عليه ورجع ألعن من الاول.
لكن م بقى كانت استبيعت ، كانت بدأت طريق ولازم تكمله، طلبت الطلاق مرة تانية ، ونفس السيناريو بالظبط اتكرر لغاية ما جه جوزها واتعهد بكل حاجة علشان يرجعها . لكن برضه مهما حصل هو مدهاش كل اللي هي عايزاه.
يعني مثلا م قلعت النقاب اللي هي مش مقتنعة بيه وفضلت محجبة ، وفك عليها شوية في مصروف البيت.وفي الخروج لأهلها وصحابها.
لكن الجامعة المفتوحة اضطرت تروحها من وراه برضه ، أظرف حاجة لما صادف انه وقت الامتحانات كان في القاهرة ، م كانت بتذاكر من وراه وبتعمل حكاية علشان تنزل تروح الامتحان وهو ميعرفش لكن برضه عملت اللي في دماغها.
**********
انا بحكي حكاية م بالذات لأنها حد أنا فخورة بيها جدا ، حد حلم رغم كل الظروف وعمل كل حاجة علشان يحقق حلمه ده.

hare and tortoise

2008-06-15T20:07:00.000-07:00

أكره تعاملي في احيان كثيرة بمنطق الأرنب والسلحفاة
فتارة أنا سلحفاة بطيئة اختارت السباق الخطأ وتنتظر نوم الارانب من حولها لتفوز
وتارة أخرى أنا أرنب يملك كل شيء ولكنه يصر على النوم في أحلك الظروف
بينما أعرف انهما الإثنين لا يصلحان
أعرف أنني أصلا لست أرنبا ولا سحلفاة
لا أنام ولا يعنيني أن ينام الاخرون
هذا ما يصيبني بالصداع الدائم
ألا يوجد بالقصة حيوان ثالث؟
***************

Travis - side

انه مايو مجددا

2008-05-04T10:23:00.000-07:00

البوست ده هو اللي المفروض أحكي فيه عن:

1-الامتحانات والمذاكرة
2-الاضراب
3- سلك النت المقطوع
4- ويترتب على النقطة اللي فاتت السايبر الغريب اللي أنا قاعدة فيه دلوقتي
5- القفشة اللي أنا قافشاها على اتنين صحابي وزعلوا مني
6- بطني اللي واجعاني وجع بدايات الاكتئاب

بس طبعا طبعا
انا مش هتكلم على أي حاجة من الحاجات دي

كل شهر مايو وانتوا طيبين

2008-04-15T14:35:00.001-07:00

الخميس الجاى 24-4

مناقشة المجموعة القصصية (خروج)

للكاتبة سلمى صلاح ( انا يعني )

تدير الندوة د.سحر الموجى

الساعة 6 مساءً

فى جامعة القاهرة- كليه الآداب

قاعة -65- مبنى قسم تاريخ

حداد

2008-04-08T15:28:00.000-07:00

أنا فعلا مش عارفة أنا حاسة ايه
ربما الأحساس الغالب هو الاذبهلال والشلل الكلي والجزئي في اعضاء الاستيعاب في الجسم
أصلا انا مش لاقية حاجة اكتبها ، لأني معملتش حاجة ، لا كنت في المحلة ولا اضربت في عيني ولا سمعت ضرب النار من حواليا في كل حتة
بس أقل حاجة أي حد ممكن يعملها انه يقول لكل الناس
أي حد معرفش اللي حصل في المحلة لازم يعرف ، علشان التعتيم اللي حاصل في الموضوع
لما تقابل زميلك في الكلية أو الشغل أو قرايبك .. اي حد ميعرفش ، من واجبك انك تقوله ، احكيله وخليه يعرف حصل ايه
دي الفيديوهات بتاعة المحلة
ودي بعض المدونات والمواقع اللي عرضت الموضوع

جبهة التهييس الشعبية
ابناء مصر
مدونة الاضراب

انزلاق الأملس

2008-02-22T22:50:00.000-08:00

ربما هو افتقاد الدافع
ربما امتلاء صحيفة الامنيات بما كان وسيكون حتى تاهت الأماني مع النزوات وأحيانا الضغائن أيضا
ربما هو اختلاط الالوان جميعها لتعطي لونا أبيض له شخصية واحدة مسيطرة على الجميع
هل تنفصل الالوان ثانية بعد خلطها؟
عندما تفقد المواد كل بروزاتها وحشرجاتها لتخرج ناعمة ملساء تفقد المحاولة كل معنى
فأنت لن تجعل أي شيء أفضل مما هو عليه بالفعل
اللهم الا اذا حاولت عكس كل شيء
انحت كل شيء لتحصل على البروز
دخن كل شيء لتستعيد حشرجة صوتك
ثم حاول من جديد
در في تلك الدائرة المفرغة للأبد ، حتى يأتيك أوانك فينقطع محيط الدائرة
هنا فقط تستطيع الادعاء بأنك عشت لتعمل جاهدا .. مغزى العمل ليس مهما على الاطلاق
*********************
يمكن علشان كده مكنتش موجودة
كل حد شقر على المكان الصغير ده ، وكل حد سأل على متغيرة الملونة
مرسي جدا جدا

ذكرى حنين

2008-01-10T12:33:00.000-08:00

يأكلني الحنين الوحشي

لشجرة ما لم يرهقني تسلقها

لبالون انفجر فوجهي فأضحك بعين وأبكي بالاخرى

لسرير نحاسي شامخ ذو ستائر بيضاء

لرائحة النعناع والريحان

لمذاق الليمون

ولبيت مدهون بالابيض المائل للاصفرار

شوفوني على o

2007-12-23T03:44:00.000-08:00

يوم الثلاء القادم 25 يسمبر ان شاء الله

هكون في برنامج مساءك سكر زيادة على O TVالساعة 7 مساء

وده هيكون لمناقشة مجموعتي القصصية خروج

ياريت بقى ابقى أسمع رأيكم في الحلقة

تدوينة بيضاء

2007-12-19T15:07:00.000-08:00

2007-12-04T17:52:00.000-08:00

الأسبوع ده حاجتين حلوين قوي حاصلين

أولا
توقيع ديوان
نفس اخر في الحجرة
لياسمين عادل
يوم الخميس 6 ديسمبر
في عمر يوكك ستور ، فوق فلفلة طلعت حرب
اليوم ده انا مستنياه من زمان قوي ، ومش قادرة اقول انا فرحانه قد ايه
وعايزة أطمن لياسمين اني لسا عند وعدي في الموضوع اياه
وبما انها هتبقى فرجة ، اللي عايز يتفرج على وعدي لياسمين بتفضل يومها

ثانيا

مناقشة مجموعتي القصصية
"خروج"
في جماعة جلسة ثقافية
في كافيتريا مركز الابداع بالاوبرا
يوم السبت 8 ديسمبر
وعايزة بالمناسبة اعتذر لأي حد ملقاش الكتاب في الفترة اللي فاتت ،
الكتاب موجود دلوقتي في ديوان
وعمر بوك ستور
وvolume one في شارع الثورة بالمهندسين وشارع 9 بالمعادي

2007-11-29T15:34:00.000-08:00

ولأن الأسباب للحزن عديدة

وأسباب الفرح تؤثر التخفي

ينزل الأمل عباءته

ليضعها على كتفي

على كتفينا

ويحتضنني .. بشدة

*****************
ساعات يهز الأرض
ياخدنا نحضن بعض
نفتح شبابيكنا ازاز وشيش
يا هل ترى هنموت من البرد .. ولا ابتدينا نعيش*

*المكتوب بالأزرق من ساعات المطر لوجيه عزيز

2007-11-15T16:43:00.000-08:00

أخيرا وبعد طول انتظار

الكتاب الذي انتظرتموه طويلا

متوفر هنا

**********************************

اعلان تاني

يوم الأحد 25 نوفمير- 6 مساء
ندوة للشاعر محمد منصور والقاصة سلمى صلاح ( أنا يعني )

بمركز طلعت حرب الثقافي بالسيدة نفيسة

يا ريت أشوفكم هناك

2007-11-03T17:20:00.000-07:00

بالأمس
كنت أنام متقوقعة: أضم أطرافي الأربعة وأدفن رأسي بينهم، كجنين يخشى كونه الجديد
اليوم
أنام على ظهري وتملا أطرافي أنحاء الفراش..تملأ الكون كله على مجال نظري
ليس أنني ازددت اطمئنانا
أنا فقط أخيف الخوف

**************************
الهام المدفعي- خطار

2007-10-31T15:18:00.000-07:00

وداعا للمستطيلات المظللة

مرحبا بالكثير من المستطيلات المتداخلة...مجددا

*******************************

محمد منير - يا طالع الشجرة

أخيرا هتشتهر يا جدعان

2007-10-09T17:06:00.000-07:00

قريبا بالاسواق

عن دار ملامح

الغلاف تصميم عمر مصطفى

حداد

2007-10-05T18:16:00.000-07:00

دعينا الى حفل تأبين الحلم
وكواجب حتمي كان علينا الظهور ، والمجاملة
التلفظ بكلمات المديح
كنا نحبه
ربما عشقناه يوما
لكنه الان وقد مات
صار ذنبه وحده

******************************************************************
Nelly Furtado- why do all good things come to an end

new look

2007-09-21T17:33:00.000-07:00

البوست ده اتأخر قوي

وده كان نتيجة لأسباب تكنولوجية بحتة

المهم اني عايزة أقول شكرا لمي وشكرا لنورا

اللي عملوه انهم جم عندي البيت ودهنا اوضتي مع بعض

عملنا نيو لوك جميل قوي وكله تفاؤل

وبجد بيعجب أي حد بيدخل الاوضة

وانا نفسي عاملي حالة تفاؤل دايمة

ده عمود مي ،محدش يسألني ايه ده بس شكله حلو

الشمس وطيور حواليها ، نورا طبعا

الوردة دي أنا ، علشان أسهل حاجة ممكن واحدة مبتعرفش ترسم تعملها

القلب ده برضه مي

مرسي يا بنات على الوقت الممتع ، اي نعم الاوضة كلها بقى عليها دهان ، والملايات باظت والارض كمان ، بس كانت حاجة عسل

واهداء بقى فري فري سبيشل ليكم

وجيه عزيز - معرفتش أحضنك

عايزة برضه ابعت الاغنية اهداء لايمان ، هي مكانتش معانا اليوم ده بس عايزة اقولها

go girl

2007-09-05T15:23:00.000-07:00

قبل ما ارد عن التاجات عايزة اقول البقاء لله في رجاء بلمليح..

البقاء لله في صوتها اللي بيخليني افتكر ذكريات كتير قوي

رجاء بلمليح- صبري عليك طال

*************************
تاج من محمد كمال

مين أكتر ست أشخاص بتحبهم؟

تيتة
ماما
حمزة اخويا
مي صحبتي
نهال وسارة بنات خالتي

هل أنت سعيد؟
الى حد كبير
i'm a super girl and supergirls don't cry
مش كده ولا ايه؟

لو اجتمعت مع حسني مبارك في مكان واحد هتعمل ايه؟

هقاوم رغبة ملحة في الهرش

بتحب مصر؟؟
انا وهي سمنة على عسل

انت مسلم؟؟

اي نعم ، الحمدلله

ليه؟؟
الحمدلله على نعمة الاسلام

مين اكتر شخصيه مش تقدر تستغني عنها ؟؟

سلمى

أكتر موقف محرج؟؟
في موقف حصل في المدرسة وانا عندي 5 سنين ، مش هحكيه لأنه محرج بجد ، ولغاية دلوقتي بيحرجني جدا لأن اي حد كان يعرفني ساعته مبينساهوش

الأمنيه اللي تتمنى تحقيقها؟؟
اني اعيش سعيدة وراضية

*******************************
2التاج التاني اختبار لإدمان التدوين

72%

Mingle² - Dating Site

*************************************
3
اسم مدونتك ؟؟

متغيرة شوية

لماذا اخترته..وماهي نيتك من وراء اختياره؟

لأنه جه في وقت في حياتي كنت بتغير فعلا ، كنت حاسة الغيير ومدركاه وحباه

هل فكرت في إغلاق مدونتك؟..والسبب؟

لأ ، قفلت المدونة القديمة ، لكن دي مبفكرش ابدا .. لأن ابتداءا من الفترة اللي عملتها فيها كنت الا حد كبير عارفة انا عايزة ايه، ومش برجع في كلامي.
صورتك في المدونة..رمزيتها؟

في الاول مكنتش عارفة احط ازاي ، دلوقتي مكسلة احط ، لكن لو حطيت اكيد هيبقى صورة حبي الاول والاخير وفارس احلامي shrek

لماذا دخلت عالم التدوين من الاساس؟

مساحة حرة للكتابة

احلى جمله قيلت لك فى وصف مدونتك؟
من كتر الكلاك الحلو الواحد مش عارف يقول ايه ولا ايه :)
بس اي كلمة حلوة بتسعدني بجد

التعليقات بالنسبه لك ..أهميتها؟
بتعرفني رأي الناس في البوست ، لأن كتير من الناس بيقولوا رأيهم بصراحة مش لمجرد المجاملة
وأكيد التعليقات مهمة علشان بتوريني الناس شايفة كلامي ازاي.

أحلى بوست كتبته ...ضع اللينك ..ثم أذكر لماذا؟

كذا واحد

أفضل مدونة قرأتها؟

أغلب المدونات اللي انا حاطاها على جنب، وعموما انا بحب المدونات الشخصية ، اللي بيتكلم صاحبها عن نفسه وعن رؤيته هو للعالم

أفضل بوست قرأته؟ وضع لينكه؟
صعب جدا ، بس كلمدونة بحبها غالبا بيبقى فيها بوست كده هو اللول الكبير:)

لوحد قل ادبه فى التعليق..ايه رد فعلك؟

محصلش قبل كده ، لكن انا بحب كل حد يقول رأيه، لو هو قل ادبه يبقى هو الجاهل مش ان

اأسوأ مدونة؟أسوأ بوست..أسوأ مدون؟

في مدونة في دماغي بس مش هتكلم عنها
بس هي عموما اي مدونة صاحبها بيسخر من الافكار المختلفة عنه بدال ما يناقشها

ايه اللي هيحصل لإيميلك لما تموت؟
تف من بقك يا عم ، ربنا يخليني ليكم

الميل محدش هيفتحه٫٫٫قشطة؟

اديت الباسوورد لحد قبل كده؟
اه اديته بس انا واثقة في الحد ده ، رغم كده برضه اديته لظروف قهرية

كانت إيه طبيعة علاقتك بيه؟
صحبتي

اسمك؟

سلمى صلاح

المشهور بيه وسط اصحابك؟ا

سلمى
سلومتشي، سلومة ، لومي
ونورا بتقولي سلامللا

وفي بعض افراد العيلة المنقرضين لسا بيقولولي بالاسم اللي كنت بتدلع بيه وانا صغيرة ، لكن مش هقوله لأني اكتشفت انه اسم كلب

عمرك؟

برجك؟

الأسد

مجال دراستك؟
اداب انجليزي – جامعة القاهرة

شخصيتك نوعها إيه؟
عادية ، عصبية شوية ، لساني مدب وكل الناس بتكرهه ، بس والله طيبة

السفر بالنسبة لك؟
عالم مش عارفة ادوقه

وقت فراغك بتعمل فيه إيه؟
بنام

الاكلة المفضلة؟
بيتزا،
كانيلوني
، مانجة
عسل بالزبدة

الصفات اللي أخدتها من بابا؟
العصبية
والمثابرة

الصفات اللي أخدتها من ماما؟

تحمل المسئولية

التفاني أكتر ست حاجات بكرهها؟
الكورة
التعصب باشكاله
الدوشة الغير ادمية( في الافراح وخلافه)
قعدة البيت من غير شغلة ولا مشغلة
التكاسل
التحكم والحجر على الحريات

أكتر ست حاجات بحبها؟
احساسي بعد ما أكون انجزت حاجة تعبت فيها بجد
القعدة انا وصحابي نهيس ونضحك
اسهر في الشارع لغاية ما اشوف الصبح
الطريق الصحراوي وانا بسمع فيروز أو lighthouse family
اقرا واكتب

كفاية 5

الانترنت بالنسبه لك؟
وسيلة لحاجات كويسة كتيرة

أمرره لمين؟
لكل واحد حلو عايز يعمله٫٫٫الوحشين نو

2007-08-21T16:10:00.000-07:00

شعر غزير يطوق الرأس، وينسدل الى القدمين. يصعب أحيانا أن تعرف مصدره ، فليست الراس وحدها مسؤلة عنه. بل كل مسام الجلد.

ما الفارق بين الانسان والحيوان؟
أفاد الحكماء قديما أن:
- ” الانسان حيوان ناطق "
و
- “ الانسان حيوان مفكر"

نظريتي الخاصة تتعلق بالشعر:

الانسان هو حيوان أقل شعرا

********************
نظرا لأن مودي شديد الموسيقية في تلك الايام المباركة ، قررت انا سلمى هانم المصونة اني احط اغنية مع كل بوست ، غالبا مش هيكون ليها علاقة أصلا بالبوست ، بس ليا مزاج احطها وخلاص

الاغنية دي تكملة لموود السن يمكن ، بس بلاقي نفسي بغنيها في المترو كل يوم وانا راجعة كمن الشغل الايام دي ...على الاقل هي اغنية متفائلة وبتحس على التفاؤل
the corrs - so young

2007-08-14T15:07:00.000-07:00

أولا هابي بيرث داي يا سلمى هانم

ثانيا
انت مش حاسة انك بقيتي عجوزة قوي، يعني 20 سنة يوووووووووووه خلاص bye bye teens

في أغنية جامدة قوي لfive for fighting
اسمها 100years
من أولما سمعتها أول مرة وهي مربوطة عندي بأي تفكير في السن ، مش عارفة الناس بتفهمها ازاي ، بس انا دايما كنت بفهمها على انك مهما عشت ، حتى لو كملت ال100 سنة هتموت هتموت ، لكن رغم كده كل سن في حاجةجميلة قوي فيها .. صحيح عدى 20 سنة في غمري.. لكن ان شاء الله في حاجات حلوة لسا جاية ، ايا كانت المدة اللي فاضلالي اني أعيشها ، فأنا واثقة ان الأحسن لسا مجاش.

كل يوم وانت طيبة يا سلمى

واحدة واحدة

2007-07-05T20:58:00.000-07:00

يحكى ان المودنة بتاعتي جاتلي وقالتلي يا بت سلمى ياست الكل ، مالك هجراني كده من ساعة ما خلصتي الامتحانات، يعني البوستين اللي فاتوا دول ميتحسبوش أصلا ..دول كانوا فقرة اعلانية.

يحكى برضه ان انا رديت عليها وقلتلها يا مدونتي يا مدونتي قوليلي مين أحسن واحدة في الدنيا

ردت عليا البت مدونة وقالتلي ممكن أحسن واحدة في الدنيا تكون أي حد ، هعرف منين يعني يا ست اخواتها ، اللي أعرفه كويس انها أكيد مش انت. وبعدين مش معنى اني سألتك هجراني ليه هتصاحبيني وتعملي نفسك الساحرة الشريرة، انجزي يا بت واكتبي حاجة عليها القيمة

انا بقى اتقمصت وعملت فيها ست الحتة ، الحقيقة اني كنت بتلكك بصراحة وعايزة اتقمص من المدونة وخلاص
بيني وبينكم مكنش في دماغي أي حاجة عليها القيمة ، او ممممم يعني كان في دماغي حاجة بس بصراحة مليش مزاج اكتبها دلوقتي..
أنا قلت أصالح المدونة بشوية فشار بس مش لاقية كبريت ، ملقتش بقى غير اني انزل بوست خناقتنا علشان تقولولي أنا الغلطانة ولا المدونة.

مسابقة...شمر دراعك

2007-06-21T08:30:00.000-07:00

الإعلان عن فتح باب التقدم لسلسلة ورقة وقلم

يسعد ورقة وقلم أن تعلن عن فتح باب التقدم لسلسلة ورقة وقلم ، والتي تخص المخطوطات المعدة للإصدار الأول للكاتب، ولم يسبق نشرها في كتاب، وذلك في المجالات الآتية: الرواية – شعر الفصحى – شعر العامية – النقد – الكتابة المسرحية – القصة القصيرة

شروط التقدم للسلسلة :

1. أن يكون المخطوط المقدم للسلسلة معداً للنشر لأول مرة ولم يسبق أن طبع في كتاب ، وألا يكون قد سبق للمتقدم نشر أى كتاب.

2. ترسل ثلاث نسخ أصلية مع أسطوانة الكومبيوتر المنسوخ عليها العمل.

3. ترسل سيرة ذاتية أدبية ، وإقرار بعدم وجود إصدار آخر في نفس المجال المتقدم إليه أو وجود أى إصدارات سابقة .

4. أن يرفق المتقدم صورة من بطاقته الشخصية أو جواز سفره أو شهادة ميلاده أو أي وثيقة رسمية تفيد ببياناته الشخصية .

5. يراعى عدم كتابة اسم المتقدم أو الإشارة إليه على العمل المطبوع .

6. الاشتراك بالنصوص في فرع واحد من فروع المسابقة ، ويكتب على الظرف الخارجى الفرع المتقدم إليه للنشر

7. لا تلتزم ورقة وقلم بإعادة النصوص .

8. تعلن أسماء الأدباء الذين قبلت أعمالهم للنشر فى سلسلة ورقة وقلم ( الدفعة الأولى ) في شهر أغسطس 2007 ، وتتكون هذه الدفعة من 12 كاتبًا بواقع أديبين فى كل مجال من مجالات السلسلة.

9. تلتزم ورقة وقلم بطباعة الأعمال على نفقتها، وتحتفظ لنفسها بحقوق الطبعة الأولى من هذه الأعمال ، على أن يبدأ النشر فى سبتمبر 2007 .

وتتكون اللجنة الاستشارية لسلسلة ورقة وقلم من السادة :بهاء طاهر - جمال الغيطانى - حسن طلب - سامى سليمان – سيد حجاب - صلاح فضل ( المشرف العام على السلسلة )

تغلق أبواب المشاركة للنشر للدفعة الأولى فى 31 يوليو 2007

ورقة وقلم تتمنى التوفيق للجميع

للتواصل : wrkawklm@yahoo.com – هاتف: 0109856036

لمزيد من التفاصيل

محمد كمال

مش هتقدر تسد ودانك

2007-06-14T17:56:00.000-07:00

بما اني زهقانة
وبما ان الامتحانات لما خلصت حسستني بحالة ملل
وبما اني في الاجازة ببقى مشغولة أكتر حتى من وقت الامتحانات ، وياريت محدش يسألني أنا مشغولة في ايه
بعد بما ان دي كلها لازم يبقى في اذا مش كده؟
ممممممم
اقولكم
اذا كل واحد منكم يفتح الراديو بتاعه يوم التلات الجاي 19 يونيو الساعة 6 العصر ويسمع سلمى صلاح اللى هي متغيرة هانم المصونة ، على اذاعة البرنامج الثقافي fm :91
الاذاعة برضه موجودة على النايل سات اللي مش موجود في مصر بس مش عارفة المحطة بصراحة
المهم يعني اللي مش هيسمع الحلقة هيتعاقب ...ماشي؟

تحديث

البرنامج الثقافي 91.5 على الأف ام ، وعلى راديو النايل سات

program 21

شكرا لمعاذ رياض

سيبريا

2007-06-01T04:50:00.000-07:00

حتى نعتاد الحياة في صحراء جليدية.
تلسعنا نفحات الضوء
لأنها ترينا كونا له ألوان أخرى

غير أبيض وحشي.

the unknown

2007-05-11T23:35:00.000-07:00

عندما تتحق المعرفة تفقد الكثير من الأشياء روعتها.
ربما لا أحب sere nere بنفس الدرجة اذا عرفت ما يقوله تيزيانو فيروبالايطالية
ربما أفقد متعة النظر الى زملاء عربة المترو وتخيل أفكارهم اذا علمتها فعلا
لكننا لا نكف عن طلب المعرفة
وعندما نعتادها تصبح عادة ذميمة
لا أطيق الصموت دون أن أعرف ما أجهله
ولا أطيق احساس اللاشيء بعد أن أعرف.

************

sere nereحمل

ghost

2007-05-04T01:52:00.000-07:00

انت موجود فعلا؟
أمال ليه الناس عيونها بتخترقك كانك لوح زجاجي؟
جسمك شفاف
وحياتك شفافة
حتى روحك أحيانا بتبقى شفافة

لكن بصراحة هو مش ده مريحك؟

cruel to be kind

2007-05-01T21:16:00.000-07:00

عمرك ضايقت حد بتحبه وانت قاصد انك تضايقه؟
قاصد انه تقسو عليه علشان تطلع طاقة ما منه، علشان تخليه يشوف الطريق الصح.
انا مش وصية على لحد ومش بحب اتدخل في قرارات أي حد اللي بياخدها في حياته الا لو سألني.
لكن لما يكون الشخص ده قريب جدا ، ما اقدرش قعد ساكتة وأشوفه بيغلط ، وما اقدرش برضه اطبطب عليه علشان خوفي انه يزعل مني.
علشان لما يزعل منى أحسن من انه يؤذي نفسه.
ممكن تجرح حد بتحبه جرح صغير أحسن ما تسيبه للي ممكن يجرحوا فيه طول الوقت من غير ما ياخد باله.
الانسان لما بيعرف أي شخص ويبتدي يتعامل معاه بيعرفه خطوة خطوة.. لكن ممكن خطوة تسبق التانية فتيجي لحظة تقول أنا وصلت هنا ازاي ، وهل أنا فعلا أعرف الشخص ده كويس رغم قربنا ده كله.. أنا عارفة انه ممكن يكون بيفكر كده دلوقتي.. ممكن يكون حاسس اني غريبة ومش قادر يتفهم موقفي.
وبجد الاحساس ده أصعب حاجة ، انك تبقى غريب لأقرب الناس ليك.
لكن برضه أسهل حاجة في الدنيا اني أوري دايما الجانب المضيء.. أسهل حاجة اني ابتسم واضحك في وشه وأنا شايفة كل اللي حاصل ورا ضهره وعاملة نفسي عامية.
الأغنية القديمة بتقول :
You have to be cruel to be kind

دايرة مخرومة من النص

2007-04-30T17:04:00.000-07:00

هواحنا السبب في اللي بيحصلنا ولا اللي بيحصلنا هو السبب فينا؟

مووووا وادي بوسة لصاحب الضربة الجوية الأولى..والأخيرة

2007-04-25T06:26:00.000-07:00

بيوقلك ايه يا سيدي ، في يوم في شهرفي سنة كان في واحد جيش بتاع بلد اسمها مصر

الحلو بقى في الجيش ده انه كان كمدلع نفسه على الاخر.. مش هو عماد البلد دي (ومحسن كمان )
قوم ايه كل واحد في الجيش ده كان بيتمتع بالذاتية والتقديمةوالديموقراطية وكل حاجة نفسك فيها. كل واحد كانت قدامه اختيارات كتيرة يعني اللي كان بيشوف افلام رشدي أباظة اختاروا سلاح الشمبانيا ، وبتوع البلدي يوكل كانوا في سلاح الحشيش والشباب الروش بقى بتاع الجيش كانوا في سلاح البانجو ، هتقولولي البانجو مكنش وصل مصر ساعتها هقولكم ده الجيش يا جدعان .. الحاجة بتوصله من قبل ما تفكر تدخل أي بلد اصلا..

في وسط الحالة العظيمة للجيش دي طلع ظابط وظووظ صغنون اسمه حمادة ( هو اسمه محمد بس هو البطل بقى ولازم ندلعه)
المهم حمادة راح للراس الكبيرة بتاعة الجيش ده وقاله :
- ياباشا احنا لازم نحارب
- أقعد يا حمادة يا ابني واهدا.. مسيرنا هنحارب ، لكن اليوم خمر ونساء

مشي حمادة من عند القائد وهو لاوي بوزه ، وقال اذا كانوا هما مش هيحاربوا أنا لازم أؤدي واجبي..
راح حمادة ركب الميكروباصات اللي بتقول المطار السري وطلع على المطار السري خد أول طيارة في الصف وطار بيها
وهو في الجو لقى واحد قاعد في الكرسي اللي وراه ، وقاله :
- انت عملتها يا حمادة ، القائد كان شاكك فيك وبعتني وراك.
وراح مديله على قفاه ضربة جامدة جدا
ومن هنا جه اسم الضربة الجوية الأولى.

من بلكونات المحروسة

2007-04-22T12:16:00.000-07:00

الكلية

2007-04-15T06:06:00.000-07:00

سلمى هانم : قوليلي يا بت ، انت بتروحي الكلية ليه؟
البت سلمى:علشان لو مرحتش مش هلاقي محاضرات أذاكر منها
سلمى هانم: وتذاكري ليه من أصله
البت سلمى : متسغبيش يا هانم ، علشان محدش بينجحها بالساهل.
سلمى هانم : احترمي نفسك يا روح طنطك.. أنا قصدي النجاح هيعملك ايه أصلا.
البت سلمى: طب استني شويتين كده أفكر.. لما أنجح هبطل أروح الكلية

سلمى هانم : علشان متجيبيش محاضرات ومتذاكريهاش.. عبقرية يا بت.

3-1

2007-04-10T19:54:00.000-07:00

3 تاجات من محمد ياسر ومادو أحدهم

الاول

هل كنت طالب شاطر فى المدرسة ؟
لغاية اعدادية كنت من الأوائل ، وكتير كنت بطلع الاولى
في ثانوي كنت مكبرة حبتين بس مش فاشلة قوي ، جبت 92 % علمي علوم
ايه كانت احب مادة و اكره مادة ليك فى المدرسة و الكلية؟
في المدرسة كنت بحب الانجليزي والعربي ، وبكره الدراسات ومشتقاتها ، مع اني كنت بحب التاريخ لكن كقرائات مش دراسة ..وبعدين في ثانوي طبعا بقيت أكره الفيزيا
في الكلية بحب اي مادة ليها علاقة باللغويات ، وبكره الشعر ..أنا بحب الشعر برة الكلية لكن الشعر في الكلية لا يطاق
كنت عايز تتطلع ايه وأنت صغير ؟
زرافة
لأ بجد مش حاجة معينة ، كنت كل شوية بغير ، في ثانوي كمان مكنتش عارفة ، كنت شايفة مواد العلمي علوم أسهل حاجة فدخلتها .. بس كده
لكن بعدين لما طلعت النتيجة كنت خلاص قررت اني هدخل اداب ..واداب فقط..وكتبتها أول رغبة مع ان مجموعي كان اعلى منها بكتير

الثانى

دائما ما تطالب المرأة بالحصول على حريتها . فما مفهوم الحرية في قاموس المرأة؟
الحرية النسبة لي ان محدش يقيم عملي على ضوء اني بنت ، لكن في نفس الوقت مش عايزة أبقى ولد ..عايزة ابقى بنت وأتعامل بطريقة عادلة كبنت.
متى احسست بنفسك "خائنة"؟
لو عملت حاجة أنا مش حاباها علشان استنى نفع منها
هل يمكن ان تحب المرأة رجلين في نفس الوقت؟ نقول الحب و ليس الاعجاب.؟
لأ مش ممكن خالص .. يمكن الست بالذات ..دي فطرتها
إذا خذلك لعديد من المرات، هل ستستمرين معه في علاقة مستقرة؟؟
ده بيعتمد على الشيء اللي يخذلني فيه ، بمعنى ، انه في شغله مثلا ، المفروض تبقى عنده الرغبة انه ينجح مش علشاني لكن علشان نفسه
لكن لو خذلني في حاجة تخصني في علاقتنا كذا مرة يمكن أمل بس بعد كتير، أنا صبور شويتين.
ماذا ترتدين فى أول لقاء لكِ مع حبيبكِ بالوصف التفصيلى؟
لبس (بتاعي) يعني لبس بيبين شخصيتي.
وزي ما بتقول الست المصونة alanis morrisette :
"one hand in pocket and the other one is giving a hi 5"
ما هى أول فكرة ترد الى ذهنك فى اللحظات الأولى بعد دخولك "المحظور"...لا توجد خيارات للإجابة؟
ها!!!!
سؤال بالعربية الفصحى الى العربية الفصحى، أيعقل أن تكون هيفا وهبي المرأة العربيةمن المحيط إلى الخليج، ماذا يمكن أن تفعلن لتغيير هذه الصورة، و كيف بامكاننا أن نساعدكن؟
العيب مش في هيفا ، العيب في اللي بيعتبرها الرمز
وان جينا للحق هما مش كتار للدرجة دي ، الناس بتقول كده وقت التهييس وبس.
إذا عجبك شاب، بتجربي تلفتيلو انتباهو، كيف؟
لأ .. بتعامل عادي لأني لو معجبتوش وأنا على طبيعتي يبقى ميلزمنيش.
إذا عجبك شاب وما بادلك الاعجاب، شو بتعملي؟
يروح ..مش هيفرق قوي يعني .. it's raining men
في مرشد بيقول انو البنت بترغب الشاب طالما انو بشكّل تحدي لها، شو رأيك؟
لأ أنا مش من النوع ده..يعني أنا بس بيهمني يكون حد كويس ..
لكن بصراحة برضه بكره اللي يدلق واحنا لسا على البر ، يعني ميبقاش فيه بينا حاجة والاقيه لازق.. يبقى ملل
هيفاء وهبي، شادية، وفاتن حمامة: مع من تتماهين أكثر؟ (بصراحة ومن دون مثاليات.
فاتن حمامة جدا.. ممكن أكون بحب شادية أكتر ، لكن أنا عارفة ان شخصيتي فيها من فاتن حمامة ( في افلامها يعني)
انتقي شخصية رجالية معروفة تتمتع بالكاريزما (برأيك) وتكلمي عنها ؟
جمال عبدالناصر رغم اختلافي معاه سياسيا الا انه كتلة كاريزما
برضه من الممثلين جاك نيكلسون.. الراجل ده هيموت وهيفضل قبره شايل الكاريزما
ونصيحةأو تعليق أرجو نشره: لما تبلشي تحكي لصاحبك عن أسماء ولادك المفترضة(لأنن بعد ما إجو وأصلاً بعد ما انفتحت سيرة زواج، إلا إذا حاطة براسك الأمومة العازبة)تأكدي إنو صادر قدامك إيام صعبة قريبة جايي
مش فاهمة
بس أنا طول عمري نفسي أسمي ولد نواز .. بس محدش عاجبه الاسم أصلا.
لماذا تنفخ المرأة في كل الزبادي كلما لسعتها الشوربة؟
يمكن دي حساسية
وعلى فكرة مش المرأة بس.. دي طبيعة انسانية
هل صحيح أن المرأة تختار الشخص غير المناسب في فترة المراهقة والشباب ثم تندب حظها بعد ذلك؟
المراهقة اه يمكن..
بس بعد كده بيعتمد على امتى بتنتهي المراهقة ، لأن المراهقة سلوك مش سن
يعني لو البنت عقلها ناضج هيكون غالبا اختيارها سليم.
ما هو أسوأ موعد غرامي مر بك؟ وما هو أكثر جزء ضايقك في هذا الموعد؟
مفيش
لماذا تدعي اغلب النساء انهن لا يجدن الطبخ؟
يا عم وهندعي ليه.. يا ريت بعرف أطبخ لاحسن انا بعز الأكل قوي
ذكرى وظروف اول قبلة؟
نعمين يا اخويا.. كده قلة ادب
هل تقبلين بأستمرار العلاقة التي تربطك بشخص (زوج أو عشيق) في حال مات الحب بينكما؟؟
لأ .. مش بحب أعيش لمجرد اني عايشة.. عايزة أفضل سعيدة.
هل يستحق الرجل التضحية بكل شيء من اجله والبدء معه بحياة جديدة تبدأين فيها من الصفر؟؟
ده بيعتمد على الراجل..
في واحد يستحق كل حاجة وواحد مسيتحقش أضحي بشرابي من أجله.

التالت

هل تسعد عندما يمرر لك احدهم تاج؟
والله كويس انه جت منه وافتكرني يعني
هل مقدار سعادتك أو شعورك ايا كان- عند تمرير التاج لك يختلف حسب المدون الذي يمرر لك التاج؟
يمكن.
لأن ساعات الواحد بيبقى مش متخيل أن الشخص ده ممكن يفتره ولو بحاجة صغيرة.
?هل تستمتع عند إجابتك عن أسئلة التاج
نوعا
هل ترى للتاج أهمية حقيقية؟
يخلي الناس تعرف عنك اسرارك العسكرية علشان يذلوك بيها بعد كده
هل فكرت في عمل تاج خاص لك من قبل؟
ازاي يعني ..هو بيتعمل؟والله انا طول عمري بسأل على أصل التاج ده مش عارفة.
هل تفضل قراءة اجوبة التاج عند المدونين الاخرين؟ أم لا تهتم سوى بالتدوينات الأخرى فقط؟
حسب المدون.
في ناس بحب اتجسس عليهم طبعا
عندما ترد على التاج ما الذي تراعيه اكثر؟
اللي في قلبي يبقى على كي بوردي.
هل تحرص على قراءة اجابات من تمرر لهم التاج ؟ و هل تغير إجابتهم للتاج شيئا في ادراكك لهم ؟
اه بحرص طبعا.. ويمكن تغير ليه لأ.. لما نشوف
هل تلتزم حرفيا بأسئلة التاج ؟
يعني ايه.. هو انا ممكن أغير؟
ما هي نوعية التاجات التي تفضلها؟
التاج الرزل عند الناس والتاج الطيب عندي.
إلى من تحرص على تمرير التاج؟
الى الناس الكويسة ..حبايبنا

بالمرة بقى في تاج قديم قوي من ايات انا كنت مطنشاه

اكتبى 5 حاجات ماحدش يعرفهم عنك
1- انا بكره القطط جدا، علشان وأنا صغيرة كنت بشوفهم في أحلامي باشكال شنيعة، لغاية دلوقتي مش بنسى الاشكال دي ومش بقدر احب أي قطة، حتى صور القطط بتقززني
2- أنا بترعب من أي كلب مهما كان حجمه أو شكله أو تربية بيوت أو شوارع ، وأول ما بشوف الكلب أفضل اقرا أدعية وقران واحط لساني بين سناني علشان ما اصرخش واطلع اجري
3- بشتري كل شهر ميكي جيب لأخويا الصغير علشان أقراها قبله ، وبعد أتحايل عليه يروح مسرح العرايس علشان اتحجج بيه وأروح لكن هو مش بيحبه للأسف
4- أنا عمري ما خرجت برة مصر ، وعمري حتى ما شفت المطار غير في التليفزيون..لكن حلم عمري اني أسافر المغرب بالعربية وأعدي طبعا على ليبيا وتونس والجزائر وأقعد في كل مدينة شوية..يعني رحلة تاخدلها كام شهر لسنة كده
5- بقالي حوالي 3 سنين مرحتش المتحف المصري ، رغم اني وأنا صغيرة كنت بروحه كتير جدا وأقعد أتفرج على الموميات لساعات مش عارفة ليه كنت بحب الموميات كده.

تمرر التاج ده لمين؟
هما 4 تيجان
فاللي عمل واحد منهم يعمل الباقي وهكذا

ياسمين أنا حرة علشان أغلس عليها
ايمان شلال العطر
عطشان علشان مدون جديد وعايزين ننفعه
ارتعاشات حياتية معملش بتاع المرأة.. يعمله بقى علشان بيحب التاجات.
ايات فنون بتحاول تبقى جميلة علشان خيرها سابق
سمية كيفي كده علشان بقالها كتير مش بتدون
مها شقلوطة وهتعمله غصب عنها في مدونتها القرعة
بما اننا في المدونات القرعة يبقى منقدرش ننسى معاذ رياض كمان.. يعملها أول بوست في مدونته
عزو باشا الكبير بمناسبة الديوان الجديد
أبو ضحى لدعاوي التجسس

2007-04-06T13:39:00.000-07:00

فجر النهاردة قاعدة عاملة نفسي بذاكر وبنت مجتهدة وكده
مرة واحدة
طاخ
الدنيا ضلمت
قلت كويس انها جت منهم ، علشان اخد راحة 10 دقايق
لكن الموضوع طول
ساعة اتنين تلاتة
سبعة
الكهربا رجعت بعد 7 ساعات
خمنت سبب قطع الكهربا؟
كابلات الشارع كلها اتسرقت
واحد جه بعد صلاة الفجر وفتح بوكسات الكهربا وسرق الكابلات
طب وايه الفايدة؟
هيعمل ايه بالكابلات؟
قال بياخدوا النحاس اللي فيها ويبيعوه بالكيلو علشان النحاس غلي
لأ ودي مش اول مرة تحصل في شارعنا
ناهيك عن بقية شوارع الحروسة

هو الحال وصل لكده؟

2007-04-04T13:53:00.000-07:00

سمائي ملبدة بالغيوم
لكن الضوء لا زال يظهر
خلف أكوام السحاب

2007-03-30T01:00:00.000-07:00

كأنما تحدث الأزمات فقط لتريك رؤية أفضل لمن حولك
من يهتم
من لا يفعل
ومن يهتم أن يبقيك بالأسفل

أشكر الأول لأنه أسعدني
أشكر الثاني لأنه أزال حملا من على كاهلي
أشكر الثالث لأنه رفعني دون أن يدري

الضربة اللي ما تموتك تقويك

2007-03-25T18:35:00.000-07:00

كاريكاتيري المفضل النهاردة

أغنيتي المفضلة النهاردة

عبدالوهاب - يا جمال النور والحرية

ياريت تحبوها علشان هتسمعوها بعد كده كتيييييير

مرسي كتير يا بلال

بصل

2007-03-19T17:30:00.000-07:00

انت فخور بحياتك.
.لكنك لا تدرك انها بصلة.
.كل طبقة تقشرها ، عينيك تدمع ورغم ذلك تستمرفي التقشير لأن لديك أمل في الطبقة التي تليها.
لكن دعني أواجهك بالحقيقة المؤلمة..بعد ان تنتهي جميع الطبقات ستكون البصلة فارغة ، صحيح أن الطبقة الداخلية هي أبيض الطبقات..ولكنها لا تزال مجرد طبقة أخري تحتوي على الفراغ

* * *

الكلام ده كتبته من سنة تقريبا.. كنوع من الشخبطة اللي جت في دماغي وأنا قاعدة على الكي بورد ..يعني تقريبا بدون أي تفكير مسبق.
لما شفته تاني دلوقتي حسيت إن إلى حد ما وجهة نظري ما اتغيرتش.
أي نعم انا شفت حاجات كتير حلوة السنة دي ، ومقدرش انكر انها من أحلى سنين حياتي ، لكن اللي بيحسسني باحساس الفارغ الداخلى ده هو الخوف أكتر من أي حاجة
بخاف ان سعادتي تكون مجرد طبقة بيضة وهتتقشر زي اللي قبلها..
مش خايفة من الأوقات الصعبة زي ما انا خايفة من الرتابة والفراغ. خايفة يوما ما ابقى عايشة علشان المفروض مني اني اعيش من غير ما أسأل نفسي مفروض اعيش ليه؟

أنا خايفة من البصل

في مني باص الجمعية التعاونية

2007-03-15T06:54:00.000-07:00

الولد أبو تي شيرت أحمر: تعرف الواد أشرف
الولد أبو كاب: اللي بيقف على أول الشارع
الولد أبو تي شيرت أحمر: اه
الولد أبو كاب: ماله؟
الولد أبو تي شيرت أحمر: خد مني نضارة شمس ، أعمل ايه؟
الولد أبو كاب: روح قله لو سمحت انا محتاجها
الولد أبو تي شيرت أحمر: ولو مرضيش يديهاني..أعمل ايه؟
الولد أبو كاب : يبقى تستعوض ربنا فيها بقى.

أهلا بالربيع: مش تشاؤم لكن إثبات حالة.

2007-03-11T05:53:00.000-07:00

الدنيا ربيع ووالجو كله فظيع والوش طلعت فيه كلاكيع
كلكع كلكع كلكع كلكع
طبعا ده صوت السيندريللا ( مش عارفة سموها كده علشان مرات أبوها كانت بتعذبها ولا ايه)بس المهم ان الأغنية بتتحول في ودني اوتوماتيك للفريجن بتاعي اللي فوق دهذكرياتي الجميلة معه الربيع:
1- الفصل كله رايح رحلة لكن أنا الميس بتروحني البيت ومتودينيش معاهم علشان مناخيري بتنزف.
2- الدكتور الرزيل يكتب لي حقنة كل يوم لمدة أسبوع علشان النزيف برضه..وابدأ بقى أسبوع من العذاب.
3- بابا يدخل البيت وهو شايل كيس فيه أرانب- الأكل الرسمي للعيانين في بيتنا- وماما تجبرني إني آكله.
4- الموضوع ده بقى فضل كل سنين الطفولة المشردة اللي معرفتش أتشرد براحتي فيها في الربيع.
5- الربيع بينتهي بامتحان علشان ينهوا عذابك بالعذاب الأكبر، وانا طبعا – كأي طفلة مصرية أصيلة – بكره المدرسة والامتحانات ..والجامعة والامتحانات..وأنا وانت ورقصني يا جدع.
6- وشي بقى تلاقيه غريب جدا في الربيع ، حبوب ودمامل وقرف ، وجنبها على طول وشي نفسه ناشف. وأجمد دكتور مش هيقولك تحط عليه ايه.
7- طبعا غير عيني اللي بكتب وهي معمية دلوقتي من التراب والرمل اللي دخل فيها من الطريق النهاردة.

انا بقى مش كاتبة الموضوع ده علشان حد يرد يقولي بنكره الربيع وكده ، علشان ده أمر طبيعي ان الناس تكره الربيع ..انا نفسي حد يديني سبب مقنع ان الربيع يتحب ، قال وايه يتغناله كمان..ولا ليس على السيندريللا حرج

الأصفر وحشني

2007-03-04T13:25:00.000-08:00

وأنا في تانية إعدادي سافرنا بلدنا في قنا، ده عادي لكن اللي كان غريب بالنسبة لقرايبا اننا قررنا السفر بالعربية.. لأن بالاضافة لطول الطريق ، كانت وقتها أحداث الكشح قافلة الطريق عند سوهاج، وغير كده مفيش حد بيعرف يسوء عندنا غير بابا ، فهتبقى صعبة انه يسوق المدة الطويلة دي متواصل.
بس لأن الجنان بتاعي وراثي ، فعملنا اللي في دماغنا وقررنا السفر ، انا بقى مكنتش حاطة في دماغي أي مشاكل ، أكتر حاجة كانت عجباني في موضوع الرحلة دي انها معناها اني هعد أسمع موسيقى لمدة طويلة قوي متواصل وانا بتفرج على الطريق الصحراوي .. الطريق كان فعلا رائع .. خصوصا من هنا لأسيوط ، يمكن لأن طول عمري كان بيسحرني الأصفر والجبال وما الى ذلك..
مش عارفة ازاي ساعتها مخطرش في بالي اني اقف وأصور ، يمكن لأن بابا كان هيعتبر ده كلام فارغ ، بس كل ما بفتكر الطريق ده بشتقله قوي ..
بشتاق للون الأصفر مع صوت فيروز اللي كنت بسمعه طول الطريق
قديش كان في ناس
نسم علينا الهوا
سنرجع يوما
لغاية دلوقتي كل أغاني فيروز بتفكرني بالرحلة دي.. حتى الأغاني اللي مكنتش أعرفها ساعتها زي شال والوداع ونطرونا كتير
نفسي أسافر قنا تاني بقى

فرح برؤية متغيرة بحتة

2007-02-27T03:36:00.000-08:00

بما ان العريس والعروسة متكررين فمش لازم نشوف صورهم

تعاوا تشوف الأهم

زي برد الضوافر مثلا

أو سكينة التورتة وهي بتهفهف فوق روس المعازيم

أو لو انت شاعري ، اهو القمر( عارفة ان شكله غريب بس أصل دي صور الموبايل)

يعني حسب ميولك عندنا الصورة المناسبة ..

قلي صورتك المفضلة أقول لك من أنت

muchas gracias

2007-02-24T02:42:00.000-08:00

بص بصة من فوق
حط نفسك في مكان أعلى من أي حد
في أرض أعلى وأسمى ، بص لهم واضحك على هفواتهم ، على حبهم وكرههم ومشاحانتهم .
هتعرف ازاي تتسامح مع أي قول أو فعل ، هتلاقي نفسك بتشفق على اللي بيكرهك بدال ما تكرهه.
ويوم ما هتعرف تعمل ده ، هتشكر اللي خلاك تفكر كده

شكرا انك خليتني أحب نفسي وأحب الدنيا
شكرا انك خليتني أستمتع بكل حاجة صغير في حياتي
شكرا انك خليتني أعيش كل لحظة من غير ما أستنى اللي بعدها، لأن اللي بعدها جاية جاية وبرضه هعيشها وأحبها

شكرا انك دايما موجود علشاني

2007-02-18T06:37:00.000-08:00

يحل الشتاء وغرضه الوحيد أن يغلق كل الأبواب
فيغلق أبوابا حولي وحولهم
بأمر البرد
وعندما يأتي الصيف من جديد
نكون قد اعتدنا اغلاق الأبواب
واعتادت الأبواب ملمس الحائط.

شط اسكندرية

2007-02-13T18:39:00.000-08:00

الصور دي من خروجة اسكندرية في نص السنة ، رحت حضرت فرح وتاني يوم اتفسحت شوية ورجعت على طول.

اللي في الصورة الأخيرة ده الولد بوزو أخويا الصغير عامل نفسه سرحان في البحر، بس انا اللي عجبني بعد ما شفتها العربية اللي باينة من بعييييييد..

*****************

عايزة أشكر زحل الفلكي على انه فكرني باسكندرية

بريء ودمه خفي

2007-02-09T13:31:00.000-08:00

امبارح كنت قاعدة على القهوة مع مي وشيماء وسامو و محمد ياسر
فجه ولد من أطفال الشوارع – على رأي تيته سوزان- عنده حوالي 5 أو 6 سنين وكان مصمم يبيع لنا مناديل .
بس واضح ان الولد رغم انه من أولاد الشوارع لكن عنده مبادئ ، راح لسامو علشان يشتري منه فسامو قاله روح لطنط مي هي هتشتري منك ، لكن الولد رفض وأبى وقال بشموخ " لأ ، بنات لأ" وبصلنا بصة وحشة قوي ومشي.
وكل شوية ييجي تاني يضرب سامو ومحمد ويجري ، لكن طبعا زي ما مش بيبيع لبنات هو برضه مش بيضرب بنات.
أنا بقى فسرت كرهه للبنات لسبب من الاتنين:
1- بنت تانية من أطفال الشوارع – على رأي تيتة سوزان برده- كان بيحبها لكن خليت بيه وهربت مع الولد شلاطة الفتوة.
2- البنات بخلا ومش بيرضوا يشتروا منه .

أنا أصلا مكنتش عايزة أتكلم في موضوع أطفال الشوارع ، علشان تيتة سوزان زهقتني منه ، وانتوا عارفين أنا قد إيه بعز تيتة سوزان ومبفوتلهاش جايزة – من اللي بتاخدهم كل يوم – بس قليل لما تقابل ولد من الأطفال دي ويكون لسا محتفظ ببراءته ، لسا بيخليك تضحك على أفعاله العفوية ..
الأطفال دي بتبقى اتعلمت تبقى كبيرة من زمان ، معندهمش أي براءة أو طفولة من اللي بيشوفوه بحياتهم كل يوم .
علشان كده ساعات بيبقى صعب على الناس العادية انها تتعاطف معهم.
والبراءة دي أكتر حاجة بيخسروها من قعدتهم في الشارع ، بيعيشوا حياتهم معجزين.

2007-02-06T08:45:00.000-08:00

تفعل ما تريد ،تختار الانفصال عن قطيعهم لكنك تنسى حاجياتك هناك.. وسط مرعى القطيع.وتنسى أيضا أنك اخترت أن تنساها.فطالما كانت مسمار جحا طرفتك المفضلة

2007-02-05T13:25:00.000-08:00

أنا عايزة أعتذر لكل الناس عن الغياب الكبير ده..طبعا الناس معتقدة ان انا مشغولة في الامتحانات والحوارات الفاشلة دي، لكن لا لا لاأنا مش من الناس دي، انا قاعدة قدام الكمبيوتر طول النهار ولا كأني خدت الأجازة المشكلة بقى ان الكمبيوتر المنحوس ده ربنا لا يكسبه مش بيدخل على المدونات تماما..أو بيدخل يعني لكن مش بيعمل ساين ان.كنت اتكلمت عن الموضوع ده قبل كده هنا ، لكن ساعاتها كان بصورة متقطعة ، لكن دلوقتي بصورة منتظمة الحمدلله.أصلا النهاردة بكتب بطريقة عبقرية اديت ملكة صحبتي الباس وورد وببعتلها الكلام على الماسنجر وهي تاخده كوبي وبست على الايميل انا بحذر ، محدش يحاول يقرر ملكة على الباس وورد لأنها مش هتقول حتى لو حطيتوا السيخ المحمي في صرصور ودنها

دار سوسن للنشر

2007-01-03T14:31:00.000-08:00

بصراحة أنا مكنتش مقتنعة تماما بفكرة النشر اللكتورني...
يمكن ده علشان التجربة الجدية الوحيدة الي شفتها قدامي كانت كتب عربية، واللي رغم احترامي ليها كشركة جادة تماما الا اني بعد سنتين أو أكتر من انشائها مش شايفة نجاح فعلي ليها..
بمعنى ان الشركة بتحقق مبيعات - ممكن، انا طبعا مش مطلعة على الارقام- لكن النجاح الحقيقي بالنسبة ليا كان اني أشوف كتاب ناجح اتنشر الأول على النت، نجح على النت أولا.
لكن الشركة بتعمل على الكتب المشهورة ورقيا اصلا ، فينحصر دور الشركة على اعادة التوزيع عبر الشبكة.
كقارئة ، أفضل القراءة الورقية ..كأغلب القراء. فما بالك اذاكانت القراءة الالكترونية ايضا تكلف نقودا؟
طبعا ساعتهايبقى الكتاب الورقي ثم الورقي ثم الورقي.
عندما أقبل صديقي الشاعر الجامد جدا محمود عزت على نشر ديوانه شغل كايرو على الانترنت ، لم استسغ الأمر، الديوان عجبني جدا ..حسيت ان خسارة ده يبقى على النت.
لكن محمود نفسه مكنش حاسس نفس الاحساس تجاه ديوانه. وده اللي خلاني افكر تاني في الموضوع ، يعني أكيد هو هيبقى خايف على ديوانه أكتر مني ، وهو شايف مصلحة لنشره على النت...مجانا.
محمود ، وبجنون الشعرا نشر ديوانه التاني أحلى فيلم شفته في حياتي.
وأستحلى الموضوع وأنشأ
دار سوسن للنشر
في خطوة غير مسبوقة ، أول دار نشر على الانترنت ، لا تهدف للربح ولكن تهدف الى توصيل العمل الأدبي لجمهور النت ..وتهدف ايضا ان الأديب يشوف عمله يصل الى القارىء دون الدخول في متاهات دور النشر.
المهم التجربة شكلها مبشر بصراحة ، كتابين تانيين انضموا لاصدارات الدار هما سبع صنايع لمي كامل و ذات وطن لمحمد سيد حسن.
أنا كمان بفكر في النشر قريب ...بس بعد الامتحانات بقى علشان أظبط المجموعة..ربنا يسهل.

كلمات واقعي خضراء دائما.

2007-01-01T08:41:00.000-08:00

تفقد الكلمات روعتها اذا كان الواقع اشد روعة.
وعندما تفقد كلماتي أي بريق أحمد الله على جمال واقعي، ولكنني أبغى الاثنين.أبغى أن تحوي جعجبتي كلمات وسعادة.
كنت هناك يوما.والان أنا على الضفة الأخرى.
ارى العشب على كلا الضفتين ، ولكنني لا أستطيع الجزم أيها أشد اخضرارا.كلاهما أخضر ولكنها سيستحضرا بريقهما اذا اجتمعا.

الكمبيوتر للمبتدأين( من مذاكرات عالمة كمبيوتر)

2006-12-30T15:17:00.000-08:00

ايوة هو درس تعليمي..هات بقى ورقة وقلم ومراية
يوم الأربع ، كنت عايزة أطبع قصة بتاعتي علشان اقراها في لقاء الأدباء في الساقية.لكن الطابعة المصونة مرضيتش تطبع .
قلنا مش مشكلة ، ناخدها على ديسك ونطبعها برة الفلوبي ما اشتغلش.
قلنا –كلاكيت تاني مرة – مش مشكلة أهي مي صحبتي اون لاين من سايبر أبعتهالها تطبعهالي وتجيبهالي على هناك، لسا بقولها انت في البيت ولا في سايبر لقيت الكمبيوتر هنج خالص.
قلنا – لتالت مرة – مش مشكلة ، نعمل ريستارت للكمبيوتر، وعملنا الريستارت وكان اللي كان.الويندوز وقع.
بس القصة – المنحوسة بقى- كنت بعتها لمحمود عزت اخد رأيه فيها فاتصلت بيه على التليفون علشان يبعتهالي على الميل وانا رحت سايبر فتحت الميل ونزلتها وطبعتها..حد فاهم حاجة
كل ده علشان أطبع قصة.
بس المهم انه كان يوم لذيذ، بعد لقاء الادباء حضرت حفلة اسكندريللا اللي كانت جميلة جدا.
تاني يوم بقى قلنا ننزل ويندوس جديد علشان نعرف ندخل على الشبكة المصونة.اتصلت بمي صاحبتي علشان تيجي تنزلي ويندوز( عارفة ان العجل في بطن امه بيعرف ينزله لكن أنا مش العجل في بطن امه..واضح يعني)
نزلت المأسوف على شبابها مي مين بيتها ، ولعنة الكمبيوتر ماشية وراها ، قوم ايه ، تيجي تعدي الشارع عربية واحد – ربنا لا يكسبه – خبطتها ورمتها على الطريق وأغم عليها لدرجة ان كانت هتدوسها عربية تانية لولا راجل فرمل في الوقت الصح.
بس الحمدلله مي حية ترزق ومفيش كسور كمان ، كلها كدمات.وأحسن حاجة بقى انها بعد ما اترميت في الشارع ده كله الخمستاشر قرش اللي في جيب البالطو بتاعها موقعوش.
وعلشان هي فتاة المهام الصعبة ، صممت رغم المتاعب الجسدية والنفسية والمهلبية انها تكمل المسيرة لبيتي وتيجي علشان تنزل الويندوز.
لكن الويندوز العميل أبى أن ينزل كاملا.. نزل من غير ألوان ومش معرب(مع ان نفس النسخة دي منزلين منها قبل كده وكانت شغالة)
تاني يوم بقى عبدالله أخويا جاب صاحبه وغيروا النسخة واشتغل الحمدلله.
بس من غير صوت..الريال بلاير والويندوس ميديا بلاير شغلتهم ميت مرة والأغاني مش بتشتغل.الأفلام بقى لقيتها موجودة صورة بس ويقولي مش عارفة عندك ايه في ال audio.هنتعلم بقى نعد على الكمبيوتر من غير أغاني.

اسكندريللا اليوم في ابساقية

2006-12-26T22:05:00.000-08:00

مرحتلهمش ولا حفلة قبل كده، بس شكلهم جامدين والله..ناس كتيربتقول كده
لما أرجع ان شاء الله هبقى اكتب عنهم
المهم أي حد بيحب الشيخ امام وسيد درويش يتفضل ييجي ويجيب تذكرته في ايده

( الصورة ملطوشة من مدونة كما أرى)

أيها المدون القاطن في الشبكة العكبوتية..لا تقرب بيتا الذي أحضرته لك حوجل.. بيتا فيه سم قاتل

2006-12-22T06:11:00.000-08:00

قعدوا يقولوللنا حولوا بيتا حولوا بيتا..والناس البدائيين زي حالتي قعدوا يغروهم ان بيتا استعمالها سهل ومن غير html
ولا أي حاجة من الحاجات السوبر اللي مبفهماهاش دي
وحولنا لبيتا وكان اللي كان..
وكان أول لقاء لينا مع أنكل بيتا في تلك المونة الجديدة..
وأحكم أنكل بيتا الخدعة..أول بوستين نزلوا بسلاسة تامة، لغاية ما الواحد استقر هنا ورستق حاله ، وبدأت الحرب.
اجي أرد فيمدونات أي حد ، أو حتى أرد على الناس في مدونتي ميرضاش يعمل ساين ان
علشان أنزل بوست جديد أقعد كام يوم على ما تفتح معايا ..وأكون نسيت كنت عايزة أكتب ايه أو الموضوع اللي عايزة اكتب عنه انتهى..
وكله كوم والصور كوم..
يفضل يقولي
Your image is being uploaded
لكن هيهات..لا بتأبلود ولا حاجة..
ولأني متفائلة ومبتعلمش من أخطائي ، قال ايه قمت أعمل بلوج جديد لحوارات الأدب والفن وكده.. علشان جو المدونة دي مش ماشي مع الادب خالص..المهم عملتها اخيرا امبارح بس بعد قرف..اسبوعين بحاول فيها..
لو حد ليه في الحوارات دي يبقى يزورني هناك
حورس
بس الحمدلله...لازلنا شعب بيتاوي ..
ونشكر أنكل بيتا على تعاونه معنا.
*************
تحديث:
جاية انشر الموضوع ده، تقريبا بيتا عرفت اني بشتم فيهم..راح الموضوع اتنشر في اللامعقوليزم لوحدها..ربنا يستر علينا من غضب البيتا

مش فايقة

2006-12-11T06:48:00.000-08:00

"أنا لسا صاحية من النوم ومش فايقة"
لو انت حد يعرفني هتبقى الكلمة دي تقريبا أول كلمة ببدأ بيها حديثي معاك، سواء الحديث ده على التليفون أو على الماسنجر أو حتى وجها لوجه.
المشكلة ان حياتي الأساسة بقضيها وانا نايمة..أما النشاطات الأخرى في الحياة فدي بتكون في اوقات الفراغ.
لما بقعد مع أصحابي ، ويفضلوا يحكوا عن حاجات حصلت أيام 3 ثانوي- يعني من 3 سنين بس- غالبا ممبقاش فاكراها. لكن هما بيقولولي " انت كنت نايمة ساعتها " أو " كنتي لسا صاحية من النوم ومش فايقة"
لما دخلت الجامعة ، وأنا في سنة أولى كانت في بنت كل ما تشوفني تبتسم كاننا نعرف بعض..هو بصراحة انا كنت بحس ان شكلها مألوف ، بس قلت يمكن قابلتها في امتحان القبول بتاع الكلية ولا حاجة، لغاية مرة كانت قاعدة جنبي في محاضرة، فقلت أتشجع وأسألها احنا نعرف بعض منين..طلعت انها كانت معايا في الفصل في ثانوي، ولما سألتها أمال أنا معرفهاش ليه قالتلي:"أصلك كنتي نايمة طول السنة"
طبعا عادة النوم لسا ملازماني في الكلية ، في محاضرات بدخلها مخصوص على أساس اني انام فيها ، لأن بعض الدكاترة بيساعدوا على النوم جدا..زي دكتورة ماري تيريز اللي بوصفها بشدة لمرضى الأرق.
كل يوم في الكلية مبعرفش أكمل اليوم من غير ما انام محاضرة واحدة على الأقل.ده غير طبعا ان الطريق رايح جاي ببقى نايماه في المترو.
وفي المترو ، كتير بتضيع المحطة اللي نازلة فيها لأني نايمة.في ال CTA
مرة سألت السواق اذا كان بيعدي على الحتة الفلانية، والحمدلله اني سألته لأن لولا كده كان مممكن ألف معاه طول الليل وانا نايمة..لأنه لما جت الحتة اللي انا عايزة أنزل فيها ندهلي ..وانا طبعا كنت مستغرقة في النوم ومحستش لغاية ما الركاب قاموا من مكانهم وتعاونوا انهم يصحوني...وطبعا المكان اللي كنت عايزة انزل فيه كان عدى بقاله عشر دقايق..عقبال ما فقت بقى.
زمان قريت في بريد الجمعة رسالة لواحد بيشتكي من مراته انها رغم انها ست كويسة جدا الا انها نايمة طول الوقت..حتى الطبيخ بتطبخ وهي نايمة، يعني تقوم تحط التسبيكة على النار وتنام شوية ، وتصحى بعد شوية تقلبها وتنام تاني وهكذا.
دلوقتي طول الوقت حاسة ان الست دي هي مستقبلي.
بس رغم كده مش بتضايق.. ولسا بحب أنام.

بتعرف تاكل في نفسك

2006-12-01T16:30:00.000-08:00

كنت عيانة
لأ مش حاجة جامدة، دي مجرد أنفلونزا.. بس شديدة حبتين.
لما بقى تعد في البيت 4 ايام ورا بعض من غير ما تشوف شكل الشارع فده الجحيم .خصوصا لو انت بتحب تخرج طول الوقت وبتكره قعدة البيت زيي.
ولأني مكنتش عارفة أركز في قراية أي حاجة و الكمبيوتر كمان كان بايظ فمكنش قدامي غير قعدة التليفزيون طول الوقت أو النوم أو الخناق مع اخواتي ،ولما أزهق من التلت حاجات دي بقوم بهوايتي المفضلة اكل في نفسي
وللي بميمارسوش تلك الهواية أحب أقولهم انها هواية ممتعة جدا ، ومبتطلبش مصاريف أو اي أدوات .. المهم يكون عندك عزيمة وهمة للتدريب.
علشان تقوم بتلك الهواية كل اللي عليك انك تفتكر كل المواقف اللي مريت بيها في الفترة الأخيرة.. كل حرف وكل حركة..افتكر كويس قوي.
بعدين اتبع استراتيجية look beyond
وهي استراتيجية رائعة في اللعب ، وطبعا من اختراعي.
الاستراتيجية دي بتتركز في انك تحلل تصرفات كل الناس في كل المواقف اللي انت افتكرتها دي ، وتبدأ تنسى الظاهر وتدخل للباطن ..مش فاهم طبعا؟
ابسطهالك
يعني تحاول تعرف دوافع الناس الخفية لكل تصرف تصرفوه معاك.. وتحلل الموقف حسب مزاجك بقى..مش قلنا هتاكل في نفسك.
ابسطهالك؟
هاديك مثال:
يعني لو انت مدي صاحبك معاد علشان تنزلوا تشتروا هدوم مع بعض، بعد كده هو كلمك وقالك انه ابوه مرضيش يديله فلوس ومش هيشتري هدوم مع بعض .
في العادي بقى كان ممكن تقول يا عيني ، الولد مخدش فلوس ومش هيشتري حاجة.
لكن لو اتبعت نظرية look beyond هتعرف ان أكيد صاحبك مرضيش ينزل يشتري لبس معاك علشان حاجة من اتنين: يا اما مبيعجبهوش ذوقك ، يا اما كل ما بتنزلوا مع بعض بتكوش انت على الحاجات اللي بيختارها لنفسه.
عرفت بقى انت كنت أهبل ازاي لما صدقته؟
لو انت بقى لسا جديد على ( أكل نفسك ) هتكتفي بهذه المرحلة .
لو انت راجل قديم وخبرة ، هتعد تفكر في المواقف اللي تدعم نظريتك ، لو شاطر بقى هتتصل بصاحبك وتتخانق معاه.
ولو عايز تتأكد ممكن تروح تطب عليه في البيت وتشوف الهدوم الجديد اللي اشتراها... متصدقهوش لما يقولكان عمه اللي في الامارات هو اللي جابهاله..انت بيخيل عليك برضه الكلام ده.

هواية رائعة مش كده؟
مسلية جدا، لأ ومفيدة طبعا.
.......
معلش أنا دماغي مصدعة من الأنفلونزا ومهيسة على الاخر.

عن الموت .. والندم

2006-11-23T15:02:00.000-08:00

موت حد قريب منك بيوجع جدا..
لكن موت حد تعرفه ومش قريب يمكن يوجع أكتر..
الندم ان كان قدامك فرصة انك تعرفه أكتر لكن محصلش..يمكن علشان كسلت، يمكن مكنتش شجاع بالقدر الكافي ، يمكن حسيت انك مش محتاج انك تعرفه.
لكن لما يموت بتعرف ان ده كان غلط ..كان لازم تكون أشجع ، كان لازم تنتهز الكذا فرصة اللي كانوا قدامك وضيعتهم بلا مبالاة غريبة قوي.
انت لسا ندمان ..رغم كده، لسا معرفتش كل اللي انت عايز تعرفهم، لسا بتضيع كل الفرص اللي قدامك
ولسا هتندم..هتندم كتير

يا المنديل بكرامتك..يالبلع ..يا أما انت اللي جنيت على نفسك

2006-11-21T10:07:00.000-08:00

هو كل الشعب عنده بلغم؟
كل يوم وأنا طالعة أو نازلة من سلم المترو لازم أكون محاطة بالناس اللي بتف، كأن الشعب المصري كله عنده بلغم.
وحتى لو كلهم عندهم بلغم، ايه اللي هيضرهم لو اشتروا علبة مناديل ( من ام ربع جنيه مش الكبيرة) علشان يتفوا براحتهم؟
على فكرة منديل واحد ممكن يتفوا فيه خمس مرات ، قول هما بيتفوا عشر مرات في اليوم يعني منديلين في اليوم.يبقى علبة المناديل هتكفيهم 10 ايام.يعني كأنهم صرفوا شلن بس في اليوم علشان يرحوني من تفافتهم.

في حل تاني بقى أرخص وأنضف .. يتفضوا سيادتهم يبلعوا البلغم، ده حتى فيه فيتامينات وبروتينات ( بدال الفاكهة واللحمة) وأهو يتغذوا بالمرة.

الحل بقى اللي مش هيبطل يتف انه يتعاقب بلحس تفافته من على الرصيف.

يا مظاهرة ما تمت.. خدها الأمن وطار

2006-11-14T14:40:00.000-08:00

النهاردة كان مفروض في مظاهرة أمام سينما مترو للاحتجاج على أحداث التحرش بوسط البلد . وسينما مترو بالذات بوصفها كانت مسرح الأحداث.
المهم ، أنا أصلا مكنتش ناوية أروح علشان عندي محاضرات ..وكمان علشان الوقفة بتاعة يوم الخميس اللي فات ( اللي أنا جيت على اخر 10 دقايق فيها) كانت كفاية الى حد ما.
لكن قعدة الكلية – بعيد عنكم – تسد النفس..ولأن عندي مرارة واحدة وعايزة أحافظ عليها قررت اني امشي ، فكلمت مي صحبتي وقلتلها انا رايحة المظاهرة معاكي.اتقابلنا في المترو ورحنا.
وصلنا قدام سينما مترو الساعة 3 بالظبط. كان المشهد أكثر من رائع ، تخيل معايا بقى :
حوالي 50 فرد أمن رتب مختلفة باللبس الميري اضافة الى المئات ( وأنا مش ببالغ خالص ) من اللي لابسي مدني ، وطبعا شكلهم بيبقى باين خالص ( حد موزع عليهم طقم نظارات شمس)
المظاهرة بقى مكنش فيها ولا نفر.
وده ان دل على شيء فهو يدل على ان الأمن المصري ( ربنا يخليهولنا) منضبط تماما في مواعيده، أما المتظاهرين بقى هما اللي بيتلكعوا.
هو يمكن يكون في ناس جت ، بس فرادى فالأمن مشاهم زي ما عمل معايا أنا ومي.
ان كان بقى في حاجة كويسة حصلت النهاردة فهي اني روحت بدري ولحقت فريندز..اه وكمان شفت مستر سيد ( هبقى أحكي عليه بعدين).

اغتراب الكورة

2006-11-13T02:41:00.000-08:00

يمكن هي حاجة بسيطة وهايفة لكن هي فعلا اللي بتحسسني بالاغتراب.. الكورة
يعني أنا عايشة مع أربع أفراد في البيت ده
ماما وبابا واخواتي الأتنين
الأربعة بيعشقوا الكورة بطريقة غير طبيعية، يعني من واحنا صغيرين كان الأهلي يكسب نعرف انه هيبقى يوم سعيد علينا ، بابا يخرجنا يعشينا برة أويفسحنا في أي حته ..اهو شيء من هذا القبيل.
ولما الأهلي يخسر كنا نستخبى في اوضنا علشان غالبا بابا هيزعق على أي حاجة ( بنظام التلاكيك)
لما بابا وماما يبقوا قاعدين لوحدهم وبيتكلموا كنت دايما ببقى عارفة ان الاحاديث اللي بيقولوها دي تتعلق بالكورة ، واللي عمله مرتضى منصور ( الزملكاوي الوحش) أو عدلي القيعي عرف يضحك على الزمالك ويشتري مين.
أخواتي كمان كانوا بيحبوا الكورة من صغرهم، ولما كبروا حبوها زيادة. يعني أخويا بتاع الثانوية العامة بيخرج مع الرابطة طول الوقت.. ولا كأنه فاضي
أقربها امبارح الفجر لماراح يستقبل الاهلي في المطار..

ده كله مش موضوعي ، الموضوع بقى اني بحس ان انا الغريبة في البيت ده، يعني تلات اربع أحاديثهم مش بفهم منها حاجة..
الى جانب اني ملقبة - الى جانب القابي الكتيرة- بالزملكاوية الدسيسة ، ده على الرغم اني لا بحب الأهلي ولا الزمالك.. الموضوع عندي سيان.

هو أنا معنديش حل للموضوع ده غيرانهم يلغوا الدوري ونستريح بقى من الهم ده

يا هلا بيا

2006-11-13T02:15:00.000-08:00

مش أول بلوج ليا..
لكن رغبة ساحقة ماحقة في التغيير
ولأني متغيرة دايما فأنا بغير دايما..

ودمتم